Yaxın bir saat ərzində “Qarabağ”ın Çempionlar Liqasının 1-ci təsnifat mərhələsindəki rəqibi bəlli olacaq. Artıq 5 potensial klubun kimliyi bilinir. Bunlar “Linkoln Red İmps” (Cəbəllütariq), “Rakuv” (Polşa), "Valmiera” (Latviya), “Larn” (Şimali İrlandiya) və “Svift”di (Lüksemburq).

“Football-plus.az” olaraq, potensial rəqiblərin daxili və avrokuboklardakı uğurlarını diqqətinizə çatdırırıq.

“Linkon Red İmps”
1976-ci ildə yaradılan “qırmızı-ağlar” Cəbəllütariqin ən güclü klubudu. Hazırda Xavyer Munos Sançesin rəhbərik etdiyi kollektiv 27 dəfə Milli Liqanın qalibi olub. “Linkoln” 19 dəfə “Rok” (Cəbəllütariq kuboku), 12 dəfə isə “Pepe Reys” kubokunu (superkubok) qazanıb.

47 yaşlı rəqib avrokuboklarda müntəzəm çıxış edir. İndiyə kimi Avropa turnirlərində 40 görüş keçirib. Bu qarşılaşmaların 9-da qələbə qazanıb, 7-də heç-heçə edib, 24-də uduzub. Avrokuboklarda ümumilikdə 39 qol vurub, 73-nü buraxıb. 2021/22 mövsümündə Konfrans Liqasının qrupuna düşüb.

“Linkoln Red İmps” avrokuboklarda
turnir oyun qələbə heç-heçə məğlubiyyət
ÇL 19 6 3 10
AL 11 2 3 6
KL 10 1 1 8

Rakuv
1921-ci ildə yaradılan “medalyonlar” son illərdə dirçəlməyə başlayıb. Hazırda David Şvarqanın rəhbərlik etdiyi kollektiv yalnız 1 dəfə - 2022/23 mövsümündə çempion olub. “Rakuv” 2 dəfə ölkə kubokunu, 2 dəfə isə superkuboku qazanıb.
102 yaşlı potensial rəqib ardıcıl iki mövsümdü avrokuboklarda və ancaq Konfrans Liqasında çıxış edir. Amma burda ancaq pley-off mərhələsinə qədər irəliləyə bilib. Konfrans Liqasında indiyə kimi 12 görüş keçirib: 7 qələbə, 3 heç-heçə, 2 məğlubiyyət. Ümumilikdə 13 qol vurub, 7-ni buraxıb.

"Valmiera”
1996-cı ildə yaranan “ağ-qaralar” Latviyada yeni-yeni dirçəlməyə başlayır. Hazırda Yurgis Kalnsın rəhbərlik etdiyi kollektiv bir dəfə - 2022-də çempion olub. Komandanın ölkədaxili yarışlarda başqa hansısa uğuru yoxdu. Avrokuboklarda 2021/22 mövsümündən iştirak edir. Burda cəmi 5 oyun keçirib. 2021/22 mövsümündə Avropa Liqasının 1-ci təsnifat mərhələsində “Lex”ə səfərdə 0:3 hesabıyla uduzub. Konfrans Liqasının 1-ci təsnifat mərhələsində isə “Suduva” ilə evdə heç-heçə edib (0:0), səfərdə 1:2 uduzub.
2022/23 mövsümündə KL-in 2-ci təsnifat mərhələsində “Şkendiya”ya həm evdə (1:2), həm də səfərdə (1:3) məğlub olmaqla mübarizəni dayandırıb.

“Larn”
1889-cu ildə yaradılan “qırmızı-ağlar” Şimali İrlandiyanın dirçəlməkdə olan klublarındandı. Hazırda Tiernan Lançın rəhbərlik etdiyi kollektiv 2022/23 mövsümündə premyerşipin qalibi olub. 3 dəfə ölkə kubokunu qazanıb.
134 yaşlı potensial rəqib avrokuboklarda 2021/22 mövsümündən çıxış edir. “Qırmızı-ağlar” yalnız Konfrans Liqasında çıxış edib. İndiyə kimi bu turnirdə cəmi 8 oyun keçirib. Bu görüşlərin 4-də qələbə qazanıb, 2-də heç-heçə edib, 2-də də uduzub. Kollektiv Konfrans Liqasında ümumilikdə 6 qol vurub, 7-ni buraxıb.

“Svift”
1916-ci ildə yaradılan “qırmızı-ağlar” Lüksemburqun ortabab klublarındandı. Hazırda Daniel Taysın rəhbərlik etdiyi kollektiv milli divizionun cəmi 1 dəfə qalibi olub. 1989/90 mövsümündə isə ölkə kubokunu qazanıb. Avrokuboklarda 2 dəfə iştirak edib. 1990/91 mövsümündə Kuboklar Kubokunun 1-ci mərhələsində “Legiya”ya hər iki görüşdə 0:3 hesabı ilə məğlub olaraq çempionatla vidalaşıb. 2022/23-cü “futbol ili”ndə isə Konfrans Liqasının 1-ci təsnifat mərhələsində
“Domjele” ilə evdə heç-heçə (1:1) edib, səfərdə məğlub olub (1:2).

Potensial rəqiblərə ümumi nəzər yetirdikdə avrokubok təcrübəsinə görə “Qarabağ” hər birindən üstündü, yəni ağdamlılar üçün yalnız qələbə görünür.

İLKİN SULTANLI