Futzal üzrə U-19 millimiz çətin günlərdən keçir.

"Football-plus.az" xəbər verir ki, indiyə qədər yaddaqalan uğuru olmayan komanda yüksək liqada da özünü yaxşı tərəfdən göstərə bilmir.

Yığma beynəlxalq səviyyədə sonuncu dəfə Belarusun paytaxtı Minskdə keçirilən 2-ci Müstəqil Dövlətlər Birliyi oyunlarında iştirak edib. Xatırlayırsızsa, U-19 o vaxt baş məşqçi Ağatahir Əzimovun sağlıq durumunda yaranan problemə görə İlqar Aslanovun rəhbərliyi altında meydana çıxmış, biabırçı nəticə göstərmişdi. Öncə Belarus (1:7), sonra Qırğısıztan (2:5), Özbəkistan (1:9) və Rusiyadan (1:7) olan həmyaşıdları bizimkiləri turnirə qatılmağa peşman etmişdilər. Komanda indi də evin içində qapazaltıdı. Milli yüksək liqada keçirdiyi sonuncu oyunda “Baku Fire”yə 1:10 hesabıyla məğlub olub. Ümumiyyətlə, gənclər 1 xalla turnir cədvəlinin sonundadı.

Milli hələ də İlqar Aslanovun rəhbərliyiylə meydana çıxır. Çoxu düşünürdü ki, Ağatahir Əzimov sağlamlığına qovuşanda yenidən “sükan arxasına” keçəcək. Sən demə, reallıq belə deyil. Maşallah, Ağatahir bəy indi özünü yaxşı hiss edir. Buna baxmayaraq, ona yenidən baş məşqçi kimi şans verilmir və verilməyəcək. Redaksiyamıza daxil olan məlumata görə, Futzal Federasiyasının prezidenti Zaur Axundov ona istirahət etməyi məsləhət görüb. Bildirilib ki, baş məşqçi karyerasına davam etmək mütəxəssisin sağlamlıq durumuna yaxşı təsir göstərməyəcək. Əvəzində ona başqa vəzifə vəd olunub. Hardasa, hansısa vəzifə... Hələ ki bu haqda xəbər yoxdu. Onu bilirik ki, Ağatahir Əzimov oktyabrın 1-dən etibarən yeni işinə başlamalıymış. Lakin hələ də gözləyir.

Çox güman, təcrübəli mütəxəssis özü də bilmir ki, işsiz, boş-bekar oturub nəyi gözləyir? Ümid edək ki, AFFA və ya AFF onun işsiz qalmasına biganə yanaşmayacaq. Hər halda, adam illərini futzalın inkişafı üçün xərcləyib. Üstəlik indi sağlamlığında yaranan problemlər üzündən ömürboyu, vaxtaşırı dərman qəbul etməyə məhkumdu. İşsiz qalıb, eybi yox, sabah, birisigün bu məsələ həllini tapar. Heç olmasa həmin vaxta qədər dərmanlarını almaqda yardım göstərirsiz?..

KƏNAN BAHADIR