"Sabah"ın baş məşqçisi Valdas Dambrauslas KuPS-a qarşı keçiriləcək oyundan əvvəl mətbuat konfransında iştirak edib.

Sizi litvalı mütəxəssisin fikirləri ilə tanış edirik.

- Finlandiyada olduğumuza görə çox şadıq. Bildiyiniz kimi, ilk qarşılaşmadan sonra hesab arasındakı fərq çox azdı və düşünürəm ki, hər iki komandanın növbəti mərhələyə yüksəlmək şansı var. İlk oyundakı qələbə bizi cüzi favorit hesab etməyə imkan verə bilər. Lakin eyni zamanda anlayırıq ki, Çempionlar Liqasında və ümumiyyətlə, Avropa turnirlərində səfərdə keçirilən heç bir oyun asan olmur. Bilirik ki, meydan sahibləri çox motivasiyalı olacaqlar və bütün güclərini ortaya qoyacaqlar. Biz də onların mübarizə səviyyəsinə uyğun cavab verməli, öz oyunumuzu oynamalı və ən yaxşı bacardığımız işi görməliyik. Komandamızın necə oynaya biləcəyini yaxşı bilirik. Bu axşam həmin stadionda məşq edəcəyik. Bu, məşq şəraitini anlamaq və meydanı, bizi hansı şərtlərin gözlədiyini dərk etmək üçün vacibdi. İnanıram ki, oyunumuzun ən yaxşı versiyasını nümayiş etdirə bilsək, növbəti mərhələyə vəsiqə qazanacağıq.

- İlk oyundan sonra KuPS haqda fikirləriniz necədi?
- Səfər oyunlarının heç vaxt asan olmadığını bilirəm. Rəqibin uzun və yorucu səfəri olmuşdu. Onlar üçün tanlş olmayan mühit və Finlandiyadakından fərqli şərait var idi. KuPS oyunlarının əksəriyyətini süni örtüklü meydançalarda keçirir. Lakin Bakıda təbii qazonda oynamalı oldu. Düşünürəm ki, ilk qarşılaşma komandanın həqiqi gücünü tam şəkildə göstərmədi. Onların keyfiyyətli futbolçuları var. Ötən mövsüm Konfrans Liqasının əsas mərhələsində çıxış etmələri belə vəziyyətlər üçün onlara əlavə təcrübə qazandırıb. Rəqib hər şeyin bir epizoddan asılı olduğu anda necə davranmalı olduğunu bilir. KuPS-un yaxşı məşq etdirilən komanda olduğunu düşünürəm. Onların özünəməxsus oyun üslubu və dəst-xətti var. Bunu hər komandada görmək olmur. Məncə, həmkarım orda çox yaxşı iş görür. KuPS Finlandiya çempionudu. Hansı ölkədə və hansı səviyyədə oynamağından asılı olmayaraq, hətta uşaq futbolunda belə çempion olmaq üçün xüsusi iş görməlisən. Çünki liqanı qazanmaq olduqca çətin vəzifədi. Çempiona qarşı oynayanda bilirsən ki, onlar heç vaxt təslim olmurlar, qol vurmağı, hücum etməyi, müdafiə olunmağı və sonadək mübarizə aparmağı bacarırlar. Buna görə də çox güclü, mütəşəkkil və məşq etdirilən komandaya qarşı oynayacağımızı düşünürəm. Amma bizim də öz güclü tərəflərimiz var və sabahkı oyunda onları göstərməliyik.

- Hazırda ümumi hesabda öndəsiz. Sabahkı oyuna necə yanaşacaqsız? Hücum futbolu oynayacaqsız?
- Oyundan əvvəl taktiki plan haqda danışmağı sevmirəm. Əlbəttə, rəqibin olduğu kimi, bizim də öz oyun planımız var. Həmin məqamlar qarşılaşmanı daha maraqlı edəcək. KuPS topla oynamağı bacaran, topa sahib olmağa çalışan komandadı. Biz də topla oynamaq istəyirik. Oyuna necə yanaşacağımızı sabah görəcəyik. Ümid edirəm ki, azarkeşlər qarşılaşmadan məyus qayıtmayacaqlar.

- İlk oyundan sonra KuPS-un heyətindən xüsusi fərqləndirə biləcəyiniz oyunçu varmı?
- Biz konkret futbolçuya qarşı deyil, bütövlükdə komandaya qarşı hazırlaşmışıq. Amma ilk oyunda qapıçı xüsusilə diqqətimi çəkdi. O, çox yüksəksəviyyəli oyun keçirdi. İlk ötürmələr zamanı çox inamlı idi. Ayaqla rahat oynayırdı və həm sağ, həm də sol ayağı ilə yaxşı ötürmələr verirdi. Topu oyuna daxil etmək bacarığı yüksək səviyyədə idi. Qapıda etdiyi seyvlərlə komandası üçün böyük fərq yaratdı. Digər oyunçular da yaxşı təsir bağışladı. Mərkəz müdafiəçiləri Adams və Maqassa yaxşı çıxış etdilər. Daha əvvəl də dediyim kimi, KuPS yaxşı məşq etdirilın komandadı. Onların meydanda düzgün yerdəyişmələri var və nə etməyə çalışdıqları aydın görünür. Hətta müəyyən dəyişikliklər zamanı yarımmüdafiəçilərin daha irəli çıxmasını, xətlərarasında yaranan boşluqları doldurduqlarını görə bilirsən. Onları təəccübləndirmək çox çətindi.

KƏNAN BAHADIR