Ölkəmizin futzal yığması dünya çempionatının elit mərhələsi çərçivəsində sentyabrın 15-də səfərdə Rumıniya, 20-də isə evdə Niderland ilə qarşılaşacaq.

Bu gün “Olimpik Star”da yığmanın mətbuat üçün açıq məşqi keçirildi. “Football-plus.az” xəbər verir ki, yığmanın qapıçısı Emin Kürdov bəzi sualları cavablayıb.

- Əvvəlcə komandanın hazırlığını dəyərələndirərdin…
- Bir həftədi təlim-məşq toplanışına başlamışıq. Hazırlığımız çox yaxşı keçir. Legionerlər iki gündü bizimlə birlikdədi. İnşallah, bu gün Rumıniyaya yollanırıq. Orda da oyuna qədər iki məşq keçəcəyik. Məqsədimiz vətənə yaxşı nəticə ilə dönməkdi.

- Qrupdakı rəqibləriniz haqda danışardın. Səncə, ən çətin rəqib hansıdı?
- Asan qrupa düşməmişik. Qazaxıstan bu qrupun favoritidi. Niderland da özünə görə güclü komandadı. Rumıniya millisi də heyətinə bəzi legionerlər qatıb. Bizə çətinlik yaradacaq komandadı. Məqsəd isə lider olub dünya çempionatına yollanmaqdı. Pley-off haqda düşünmürük. 15-i Rumıniya, 20-si Niderland ilə qarşılaşacağıq. Bu iki oyun bizim üçün çox vacibdi. Necə başlasaq, elə də davam edəcəyik. Bilirsiz ki, bu mərhələyə vəsiqə qazanmaq üçün bir mərhələ keçdik. Onda məşqçimiz Joze Alesio idi. Lakin indi Vitali Borisov və serbiyalı mütəxəssislər yığmanın başındadı. Onlar bu uğuru davam etdirəcək. Bizim heyətdə mən daxil bir neçə oyunçunun son dünya çempionatı ola bilər. İstəmirik ki, bu şansı əldən verək. Özbəkistanda keçiriləcək dünya çempionatına vəsiqə qazanacağımıza inanırıq.

- Azərbaycan futzalının hazırkı durumu səni qane edirmi?
- Hazırda çempionatda 6 komanda mübarizə aparır. İstəyərik ki, daha çox komanda olsun, sponsorlar çempionata cəlb olunsun. Komanda sayının çoxluğu həm milli, həm də ölkəmizi Çempionlar Liqasında təmsil edən “Araz-Naxçıvan” üçün xeyir olar. Ölkəmizdə futzalın böyük tarixi var. O zamanlar bu idman növünə maraq böyük idi. Zallar tam dolu olurdu. Arzum odu ki, yenidən həmin günlər qayıtsın. Şükürlər olsun, federasiya da bununla bağlı xeyli iş görür.

CAVİD ƏLİYEV