"Bacardığımız qədər yuxarı pillələr üçün oynayacağıq" - Samir Abasov
"Sumqayıt" Misli premyer-liqasının ilk turunda səfərdə "Səbail"i 4:1 hesabı ilə məğlub edib.
"Football-plus.az" xəbər verir ki, matçdan sonra keçirilən mətbuat konfransında "kimyaçılar"ın baş məşqçisi Samir Abasov jurnalistlərin suallarını cavablandırıb:
"Mövsümə uğurlu başlamaq xoşdu. Futbolçularımı təbrik edirəm. Ağır şəraitdə oynadıq. Oyuna pis başlamadıq. İlk hissənin sonuna kimi matç bizim nəzarətimizdə idi. Sonra bir az panika hiss olundu. Bəzi futbolçularda yorğunluq da var idi. Hər cür epizodlar oldu. Futbolçular işlərinin öhdəsindən yaxşı gəldilər. Görək çempionatda başımıza nələr gəlir".
- Komanda dünən birlikdə restoranda yemək yedi. Bəlkə qələbənin resepti budu? Hər matçdan əvvəl bunu edə bilərsiz?
- Baxarıq. Nə bilim vallah. Bəlkə də nəyinsə köməyi oldu. Komadada fiziki güc tam olaraq bölünməyib. 10-15 gün əvvəl bizə qoşulanlar bu gün meydanda idi. Bəziləri yorulanda komanda yoldaşları onların yerinə qaçmalı olurdu. Sağ olsunlar, bunu etdilər. Taktiki cəhətdən də yaxşı deyilik. Cəmi iki yoxlama matçı keçirdik. Bu gün mübarizələri uduzmamaq önəmli idi.
- Səbuhi Abdullazadəyə tez-tez irad bildirirdiniz. Bu, nə ilə bağlı idi?
- Ondan gözləntilərimiz çoxdu. Uzun müddətdi komandadadı. Daha qətiyyətli olmağını istəyirdim. İki mövqedə oynadı. Bu gün məncə, Səbuhi ən yaxşılardan idi.
- Mübahisəli penalti epizodları oldu. Bu haqda fikriniz necədi?
- Bu gün VAR sistemi var. Hakimin verdiyi qərara müdaxilə oluna bilir.
- İlnur Valievin heyətdə olmamağının səbəbi nə idi?
- İlnur komandadan göndərilib. Bunun səbəbi də ona yerli pasport verə bilməməyimizdi. Üçüncü qapıçını legioner götürmək bizim kimi komanda üçün əlverişli deyil.
- Hədəfiniz nədi?
- Bacardığımız qədər yuxarı pillələr üçün oynayacağıq. Kubok da bizim kimi komandalar yaxşı şansdı. Amma bu il çempionat çox gərgin olacaq. İlk üç yer demək olar ki, artıq bölünüb. Çempionatda möhkəmlənmək istəyirik. Öz gücümüzə inanırıq.
- Səbuhi Abdullazadə qol vurana kimi çox həyəcanlı idi. Bu, nə ilə bağlıdr?
- Bu gün onu sol cinahda oynatdım. Zəif oynayır deyə oyundan çıxarmaq düzgün olmazdı. İlk dəfədi o mövqedə oynayırdı. Səbuhini çıxarsaydım, gedişatlar edə bilməyəcəkdim.
- Sorqanın meydanda qalması və penaltini ona verməyinizin səbəbi nə idi?
- Əksinə, mənə çox xoş təsir bağışladı. Uduzmaq istəməməyi, etdikləri bu gün mənim üçün yetərli idi. Penalti elədi ki, topu götürənə kənardan müdaxilə etsək, digəri vura bilməsə, özümüzü qınamalı olacağıq. Hələ ki, konkret penaltiçimiz yoxdur. O qədər işimiz olub ki, buna vaxt ayırmamışıq.
Digər xəbərlər
