"Səbail" Misli premyer-liqasının ilk turunda doğma meydanda "Sumqayıt"a 1:4 hesabı ilə məğlub olub.

"Football-plus.az" xəbər verir ki, matçdan sonra keçirilən mətbuat konfransında paytaxt təmsilçisinin baş məşqçisi Şahin Diniyev jurnalistlərin suallarını cavablandırıb:

- Ötən mövsüm də hakimlərdən danışırdınız. Bu gün də penalti oldu...

- Biz də səhv edirik, hakim də. Bu, emosiyadı. Oyunu çox gecikdirirdilər. Qomisə sarı vərəqə verməyə bilərdi. Sırf hakim bizi uduzdurdu deməzdim. İradlar var, olacaq da.

- "Səbail"in verilməyən penaltisi və qapınıza təyin olunan penalti barədə nə deyə bilərsiniz?

- Çiyin-çiyinə epizodda penalti verilməyə bilərdi. Eyni epizodlar idi. Birində verir, birində vermir. VAR sistemi var. Ola bilər ki, mən səhv edərəm.

- Qollarda mərkəz müdafiəçilərinin səhvləri var idi. Bu boşluqları necə aradan qaldıracaqsız?

- Əlbəttə səhvlər var idi. Bu, futbolda olan şeydi. Belə oyunlardan sonra mütləq nəyisə dəyişməlisən. Bu da baş verəcək. Böyük bir hadisə baş verməyib. Çempionatda iddiamızı davam etdirəcəyik. Məğlubiyyət mənim məğlubiyyətimdi. Futbolçuların deyil. Bütün məsuliyyəti öz üzərimə götürürəm.

- Adil Nağıyev ötən mövsümdə də səhvlər edirdi, bu gün də səhv etdi. Onunla fərdi söhbət edirsiz?

- Əlbəttə olur. Asan qollar buraxdıq. Məğlubiyyəti konkret olaraq kiminsə üstünə atmaq məşqçinin zəifliyi olar. Hamımız məğlub olmuşuq. Yeni səhifə açmalıyıq.

- Köməkçi məşqçinizlə dördüncü hakim arasında mübahisə yaşandı. Bunun səbəbi nə idi?

- Daha çox oyunun gecikməsi ilə bağlı idi. Futbol emosiyalar oyunudu.

- Əvəzetmələri gec etməyiniz nə ilə bağlı idi?

- Nə qədər qol vəziyyətlərimiz var idi. Buna görə dəyişikliyə lüzum görmürdüm.