Enes Ünal ardıcıl 2-ci dəfə “Xetafe”də mövsümün oyunçusu seçildi!
“Xetafe”də növbəti uğurlu mövsüm keçirən Türkiyə yığmasının üzvü Enes Ünaldan xəbər var.
"Football-plus.az" xəbər verir ki, Madrid təmsilçisi La Liqada mövsümü 15-ci pillədə başa vuraraq çətinliklə də olsa, elitadakı yerini qoruya bildi. Bunda bəlkə də əsas pay sahibi məhz Enes oldu. Düzdü, o, 36-cı turda “Betis”lə səfər oyununda ağır zədə alaraq meydanı göz yaşları içində tərk etdi. Xaçvari bağları qopan və əməliyyat olunaraq ən azı 8 aylığa sıradan çıxan hücumçu son iki turda komandasına kömək edə bilmədi. Amma Enes La Liqada 35 qarşılaşmada 14 qol, 3 məhsuldar ötürməlik performans sərgiləyərək “Xetafe”nin həm ən sərrast, həm də ən faydalı oyunçusu oldu. Bu üzdən Enes fanatlar tərəfindən keçirilən sorğuda 2022/23-də komandanın ən yaxşı futbolçusu seçildi. Srağagün ona “Xetafe”nin baş sponsoru olan “Mahuo” şirkəti tərəfindən xatirə hədiyyəsi verildi. Diqqəti çəkən məqam odu ki, Enes bu mükafatı ardıcıl 2-ci mövsüm qazandı! 2021/22-də isə o, bu klubun heyətində La Liqada keçirdiyi 37 oyunda 16 qol, 1 məhsuldar ötürməlik performansla bu mükafata sahib çıxmışdı. Zədə üzündən Türkiyə yığmasının düşərgəsindən də kənar qalan Ünal mükafatı qəbul etdikdən sonra klubun saytına bunları deyib:
“Uşaqlıq illərimdən bəri futbol oynadığım hər mövsümdə qarşıma təkcə yaxşı futbolçu və forvard olmaq yox, həm də nümunəvi idmançı olmaq hədəfi qoymuşam. Həm meydanda, həm də ondan kənarda yaxşı insan olmağa çalışıram. Hər iki hədəfimə çatdığımı görmək mənə böyük qürur və sevinc bəxş edir. Bir futbolçunun və idmançının başına gələ biləcək ən ağır zədələrdən biri ilə qarşılaşmışam. Təbii ki, ən qısa müddətdə yenidən komanda yoldaşlarımla birlikdə olmaq istərdim. Amma bu, elə bir zədədi ki, müalicənin müddətini heç cür qısaltmaq mümkün deyil. Əksinə, belə zədələrdə meydana vaxtından tez qayıtmaq daha da hər şeyi qəlizləşdirə bilər. Ona görə də indi ancaq sakit və səbirli olmalıyam. Zamanı gələndə məşqdə yenə dəlilər kimi ora-bura qaçacam. Ümid edirəm ki, “Xetafe” gələn mövsüm artıq elitada qalmaq üçün oynamayaraq daha yuxarı pillələrdə qərarlaşacaq”.
Digər xəbərlər
