“Xetafe”də karyerasını uğurlu şəkildə davam etdirən Türkiyə yığmasının üzvü Enes Ünalla bağlı transfer şayiələri yayılıb.

"Football-plus.az" xəbər verir ki, Madrid təmsilçisi zəif mövsüm keçirir və La Liqada yerini qorumaq uğrunda mübarizə aparır.

“Xetafe” sona 4 tur qalmış hələ də düşmə zonasındadı. Ona görə də komandanın əsas qol silahı sayılan Ünalın gələcək aqibəti maraq doğurur.

İspaniya mətbuatının iddiasına görə, ona ölkənin “Barselona”, “Real”, “Sevilya” və “Atletiko” kimi nəhəng klubları maraq göstərir. Amma ən ciddi maraq “Benfika”dandı.

Portuqaliyanın “Rekord” nəşrinin yazdığına görə “Benfika” böyük ehtimalla bu yay əsas hücumçusu Qonsalo Ramoşla vidalaşacaq. Lissabon nəhəngi onun yerini ya Enes Ünal, ya da “Feyenoord”un meksikalı forvardı Santyaqo Ximenes ilə doldurmaq niyyətindədi. Amma Enesin dəyəri bir qədər ucuz olduğuna görə “qartallar” məhz bu futbolçuya üstünlük verir.

Xəbərdə qeyd olunur ki, “Xetafe” 26 yaşlı futbolçuya görə ən azı 20 milyon avro tələb edir. “Xetafe” ilə “Benfika” arasında danışıqlar getsə də, lissabonlular hələ ki rəsmi təklif irəli sürməyib.

“Xetafe”nin prezidenti Anxel Torres türkiyəli oyunçu ilə bağlı verdiyi son açıqlamasında bunları deyib:

Enes Ünal bu mövsüm İspaniya çempionatında 14 qol vurub və bombardirlər yarışında 4-cü pillədə qərarlaşıb. Onun “Xetafe” ilə 2025-ci ilə qədər müqaviləsi var.

Onu da bildirək ki, son turda “Real”a qarşı səfər oyununu zədə üzündən buraxmalı olan Ünal mayın 3-də “Selta” ilə qarşılaşmada adını tarixə yazdırmışdı. O, La Liqada 196-cı oyununa çıxaraq Nihat Kahveciyə məxsus rekordu yeniləmiş və turnirin tarixində ən çox oyun keçirən türkiyəli futbolçuya çevrilmişdi.

“Bursaspor”un yetirməsi olan və İspaniyada “Xetafe”dən başqa “Vilyarreal”, “Levante” və “Valyadolid”də forma geyən Enes bu 196 qarşılaşmada 52 qol vurub.

Onu turnirin ən məhsuldar türkiyəli oyunçusu olan Nihatın (75) göstəricisindən 23 qol ayırır.