Dünən İspaniya çempionatının 24-cü turunda ''Xetafe'' öz meydanında ''Jirona''nı 3:2 hesabı ilə məğlub etdi.

"Football-plus.az" xəbər verir ki, yaxşı mövsüm keçirən ''Xetafe''nin əsas qol silahı Enes Ünal qələbədə mühüm rol oynadı. Türkiyə yığmasının üzvü biri penaltidən olmaqla 2 qol vurdu. Bununla da 25 yaşlı hücumçu cari mövsüm La Liqada qollarının sayını 10-a çatdırdı və ardıcıl 2-ci mövsüm bu turnirdə 10 qol həddinə çatmağı bacardı. Enes madridlilərin heyətində çempionatda ümumilikdə 30-cu qolunu vurdu. Bununla da o, Roberto Soldadonu (29) geridə qoyaraq ''Xetafe'' tarixində La Liqada ən çox qol vuran oyunçuların siyahısında 4-cü pilləyə yüksəldi. Amma Ünal artıq bu mövsüm bu göstəricidə zirvəyə yüksələ bilər. Çünki ilk ''3-lük''də qərarlaşanlarla fərq böyük deyil. Xayme Mata 31 qolla 3-cü, Anxel Rodriges 36 qolla 2-ci, Manu del Moral isə 37 qolla 1-ci pillədədi. Maraq üçün bildirək ki, Enes indiyə qədər La Liqada ümumilikdə 187 oyuna 48 qol vurub və bu turnirin tarixində ən məhsuldar türkiyəli oyunçuların siyahısında yalnız Nihat Kahvecidən (195 oyun, 75 qol) geri qalır.