Türkiyə yığmasının üzvü Enes Ünalın İspaniya karyerası uğurlu şəkildə davam edir.

"Football-plus.az" xəbər verir ki, ''Xetafe''də 3-cü mövsümünü keçirən forma geyən 25 yaşlı forvard komandasında fevral ayının ən yaxşı futbolçusu seçilib. Bu nominasiyada qalibi ''Mahu'' şirkəti müəyyənləşdirir. Klubun sponsorlarından olan bu şirkət hər ayın oyunçusunu seçmək üçün fanatlar arasında sorğu keçirir. Enes fevralda 4 La Liqa oyununda 3 dəfə fərqlənmişdi. Türkiyəli hücumçu mükafatı qəbul etdikdən sonra bunları deyib: ''Fanatların mənə layiq gördükləri bu mükafata hər zaman meydanda qarşılıq vermək istəyirəm. Daha da inkişafa can atmaq və komandam üçün meydanda əlimdən gələni etmək istəyirəm''. Enes Ünal bu mövsüm komandasının qollarının təxminən yarısının (25-dən 12-nin) müəllifidi. O, bombardirlər yarışında yalnız 15 qollu Robert Levandovskidən geri qalır. Enes ''Xetafe''nin əfsanəsinə çevrilmək baxımından əmin addımlarla irəliləyir. Bu futbolçu ötən mövsüm də 3 dəfə - noyabr, yanvar və fevralda Madrid təmsilçisində ayın oyunçusu seçilmişdi. ''Xetafe''də onun aktivində artıq 32 qol var. Ünal klub tarixinin ən məhsuldar oyunçuları siyahısında yalnız Anxel Rodriges (36) və Manu del Moraldan (37) geri qalır. Bu gedişlə forvard martda da ayın ən yaxşısı seçiləcək. Çünki Enes artıq bu ay meydana çıxdığı hər iki qarşılaşmada dubl edib!