Şahin Diniyev iyunun 15-dən sonra legioner transferinə fokuslanacaq
“Səbail” də növbəti “futbol ili”nə hazırlığı davam etdirir. Bilindiyi kimi, ötən mövsüm boğulmaqdan çətinliklə xilas olan “dənizçilər” çempionat bitər-bitməz islahatlara start verib.
Üç mərhələdən ibarət heyət komplektləşdirmə planının, demək olar ki, ikinci hissəsi də başa çatmaq üzrədi. Klub bir neçə futbolçu ilə yolları ayırıbsa, yeni transferlər etməyi də bacarıb. Bununla belə, mətbuatda paytaxt təmsilçisi haqda bəzi iddialar dolaşır. Deyilənlərə inansaq, sadəcə, komandada yox, rəhbərlikdə də bəzi dəyişikliklər gözlənilir. Hətta Şahin Diniyev də köklü dəyişikliklərin baş tutmasında maraqlıdı. Bunlardan ən diqqətçəkəni isə icraçı direktor Fərəc Əliyevin Səbuhi Səfiyarlı ilə əvəzlənməsi xəbəridi. Deyilənə görə, “Xəzər Dəniz Gəmiçiliyi” QSC-nin rəhbərliyi ilə baş məşqçi arasında görüş keçirilib. Rəsmilər Şahin bəyə geniş səlahiyyət veriləcəyini bildiriblər. Mütəxəssis də bundan istifadə edərək yeni planlar qurub və klubda könlü istəyən ab-havanı yaradır. Digər tərəfdən, ardı-arası kəsilməyən ayrılıq, transfer xəbərlərindən sonra üç gündü “Səbail”də sakitlikdi. Görəsən, yeni oyunçuların gətirilməsi, heyətdəkilərin yol salınması prosesinə ara verilib, yoxsa hələ dəqiq qərar olmadığından açıqlama verilmir?
"Football-plus.az" olaraq yuxarıda qeyd olunan iddiaları dəqiqləşdirmək və ən son məlumatları əldə etmək məqsədilə “Səbail”in baş məşqçisi Şahin Diniyevlə əlaqə saxladıq. Mütəxəssis əvvəlcə Fərəc Əliyevin məsələsinə aydınlıq gətirdi:
“Son günlərdə haqqımda yazılanlardan xəbərim var. Belə uydurma söz-söhbətlərin kimin sifarişi ilə yayıldığını yaxşı bilirəm. Klubda görülən işləri, inkişafa səbəb olacaq prosesləri, düşünülmüş islahatları qəbul etmək istəməyənlər mətbuatın gücündən istifadə edib ara qatmaq istəyirlər. Buna imkan vermək olmaz. Mən, sadəcə, baş məşqçiyəm. İşim heyət formalaşdırmaq və onu düzgün istiqamətləndirib uğur qazanmaqdı. İcraçı direktoru təyin etmək də, vəzifəsindən azad etmək də rəhbərliyin funksiyasıdı. Heç yerdə görünməyib ki, səlahiyyətlərimə daxil olmayan mövzu haqda tövsiyə verim, kiməsə yol göstərim. “Səbail”də ancaq komandanın məsuliyyətini daşıyıram. Fərəc Əliyev klubda hörmət etdiyim, səmimi münasibətim olan şəxslərdən biridi. İndiyə qədər bir-birimizin xətrinə dəyməmişik. Ümid edirəm ki, bundan sonra da elə olacaq. Onun klubdan uzaqlaşdırılması haqda nəsə demək mənə yaraşmaz. Burdakı hədəfim komandanı gücləndirib növbəti mövsümdə layiqincə çıxış etmək, qaneedici uğurlar qazanmaqdı. Başqa mövzuların müzakirə edilməsi, adıma qarayaxmaların tirajlanması yersizdi və xoşagələn hal deyil”.
Mütəxəssisin heyətdə gözlənilən dəyişikliklərlə bağlı açıqlaması isə belə oldu:
“Rafael Məhərrəmli, Elmir Tağıyev, Ədilxan Qarəhmədov və Rahid Əmirquliyevlə yolları ayıracağıq. Rahid yaxşı oğlandı. Komandanın uğurlarında payı olan zəhmətkeş futbolçulardan biridi. Ona klubda başqa iş təklif ediləcək. Qəbul edib-etməyəcəyini deyə bilmərəm, öz işidi. Komandada işinə davam edəcək oyunçulara gəlincə, Ağabala Ramazanov, Adil Nağıyev, Hüseynəli Quliyev, Cabir Əmirli, Vüqar Həsənov, David Qomis və Samir Abdullayev kimi futbolçular növbəti mövsüm üçün heyətdə olacaqlar. İlkin Muradov isə sual altındadı. Mən ayrılmamasının tərəfdarıyam, amma dəqiqləşməyən bəzi məsələlər var. Üç mövqe üçün yerli futbolçu axtarışındayam. İki gün ərzində bu yöndə işlərimi başa çatdıracam. İyunun 15-dən sonra isə legionerlərlə bağlı hissə, yəni son mərhələ start götürəcək. Bu mövzuda hələ ki “sular bulanıqdı”.
Şahin Diniyev “Neftçi”nin yarımmüdafiəçisi Rəhman Hacıyevin icarə əsasında “Səbail”ə gətiriləcəyi haqda yayılan xəbərləri də təkzib etdi.
Beləliklə, aydın oldu ki, “Səbail” Rahid Əmirquliyevlə müqaviləni yeniləmək niyyətində deyil. Ona klub daxilində başqa iş təklif ediləcək. Görəsən, yarımmüdafiəçi “dənizçilər”in təklifi ilə tanış olub? Futbolçu kimi karyerasına davam etməklə klubdaxili hansısa işlə məşğul olmaq arasında hansı seçim ona daha yaxındı? Ümumiyyətlə, onunla maraqlanan başqa klublar var? Əmirquliyevlə əlaqə saxlayıb suallarımıza cavab aldıq:
“Klubdaxili iş haqda xəbəri ilk dəfə sizdən eşidirəm. Mənə bu haqda məlumat verilməyib. Şahin Diniyevlə görüşümüz baş tutmayıb. Digər tərəfdən, hələ ki heç bir klubdan təklif almamışam. İstəyərəm ki, daha 1 il futbol oynayım. “Səbail”də çalışmağa davam etmək məsələsinə gəlincə, təklifdən asılıdı. Nədən ibarət olduğunu hələ bilmirəm”.
Qeyd edək ki, daha əvvəl Luvaqa Kizito, Qustavo de Fransa, Qoba Zakpa, Franko Mazurek, Pyotr Stasyuk, Emil Martinov, Ruslan Hacıyev, Mirabdulla Abbasov, Nihad Qurbanlı, Turan Manafov və Maksim Çex “Səbail”lə vidalaşıb. Yusif Nəbiyev, Süleyman Əhmədov və Rüfət Abdullazadə isə yeni gələnlər siyahısındadı.
KƏNAN BAHADIR
Digər xəbərlər
