Qarşıdakı günlərdə “Səbail”in icraçı direktoru postunda dəyişiklik olacaq. Etibarlı mənbədən “Football-plus.az”a daxil olan məlumata görə, hazırda bu postu tutan Fərəc Əliyev işindən uzaqlaşdıralacaq.

Mənbəmizin sözlərinə inansaq, mövsüm başa çatan sonra “dənizçilər”in baş məşqçisi Şahin Diniyevlə klubun sponsoru “Xəzər Dəniz Gəmiçiliyi” (ASKO) QSC-nin rəhbərliyi arasında görüş olub. Görüşdə rəsmilər Şahin bəyə yeni “futbol ili”ndə geniş səlahiyyət veriləcəyini, islahatlara indidən başlayaca biləcəyini bildiriblər. Baş məşqçi ötən mövsüm ümidləri doğrultmayan futbolçuların yola salınması ilə yanaşı, icraçı direktor Fərəc Əliyevlə də işləmək istəmədiyini bildirib. Diniyev yaxşı bilir ki, Mahmud Qurbanovun gedişindən sonra icraçı direktor “dənizçilər”in “sükanı arxasına” Kaxaber Tsxadadzenin dəvət olunmasının tərəfdar olub. Ancaq onun planı baş tutmayıb. Diniyev gələndən sonra isə özünə yaxın bəzi futbolçularla baş məşqçiyə badalıq vurmağa çalşıb. Lakin təcrübəli, oddan-alovdan çıxmış Diniyev onun planını başa düşüb və icraçı direktorun dəstəsində olan futbolçularla dil taparaq komandanı elitada saxlamağı bacarıb. Və sonda artıq qeyd etdiyimiz kimi Fərəc bəyin “qələmini qırıb”.

Bəs yeni icraçı direktor kim olacaq? Onun kimliyi artıq məlumdu. Baş məşqçi rəhbərliklə görüşdə adı çəkilən posta Səbuhi Səfiyarlının namizədliyini irəli sürüb.

RƏŞAD