Aftandil Hacıyevin gedişindən sonra 3 mütəxəssisin adı “Səbail”lə yanaşı hallanır.

Şahin Diniyev, Mahmud Qurbanov və Tərlan Əhmədovdan birinin boş qalan kresloya əyləşəcəyi gözlənilir. Məsələ ilə bağlı “Football-plus.az” saytına açıqlama verən Diniyev heç nədən xəbərinin olmadığını, klub rəhbərliyinin onunla əlaqə saxlamadığını söyləmişdi.

Futbol ictimaiyyəti arasında gəzən söz-söhbətə inansaq, “dənizçilər”i çalışdırmağa ən real namizəd Mahmud Qurbanovdu. Hətta o da deyilir ki, 49 yaşlı mütəxəssis artıq klubun əsas sponsoru olan “Xəzər Dəniz Gəmiçiliyi” Qapalı Səhmdar Cəmiyyətinin rəhbərliyi ilə görüşüb və razılıq əldə olunub.

Söylənilənləri dəqiqləşdirmək üçün Mahmud bəylə əlaqə saxladıq. PRO kateqoriyalı mütəxəssis “Football-plus.az”a qısa açıqlamasında deyilənləri nə təsdiq, nə də təkzib etdi:

"Hələ heç nə məlum deyil. Dəqiqləşməmiş məsələ barədə danışmaq düzgün olmaz”.

Qeyd edək ki, Mahmud Qurbanov hazırda rəsmən “Neftçi-2”nin baş məşqçisidi. Kluba yaxın mənbədən redaksiyamıza ötürülən məlumata görə, Mahmud bəyin “Səbail”ə yollanacağı böyük ölçüdə dəqiqləşib.

RƏŞAD