Baş həkim: “Orqanları funksiyalarını icra edə bilməyəcək halda idi”
Mayın 8-də bir müddət əvvəl məşq zamanı ürəyi dayanan və dərhal xəstəxanaya yerləşdirilən U-21 millimizin və "Qarabağ-2"nin futbolçusu Şirxan Həsənzadə dünyasını dəyişdi.
21 yaşında vəfat edən müdafiəçi mayın 9-da doğulub boya-başa çatdığı Astara rayonunun Şahağac kəndində torpağa tapşırıldı. “Qarabağ” rəhbərliyindən tutmuş, sıravi əməkdaşlara qədər hər kəs dəfn mərasimində iştirak etdi. "Qarabağ-2"nin məşqçiləri və Şirxanın komanda yoldaşları da orda idi. “Qarabağ”ın prezidenti Tahir Gözəl klub saytına açıqlamasında mərhumun yaxınlarına və futbol ictimaiyyətinə başsağlığı verdi. Əldə etdiyimiz məlumata görə, qarşıdakı günlərdə Qurban Qurbanovla əsas komandanın üzvləri də Astaraya səfər edəcək.
Qeyd edək ki, Azərbaycan futbol tarixində sonuncu dəfə eyni səbəbdən bədbəxt hadisə 2016-cı ildə yaşanmışdı. Gəncə futbol məktəbinin yetirməsi, yarımmüdafiəçi Şəhriyar Xəlilov 25 yaşda ürəktutmasından vəfat etmişdi. O, karyerası boyunca “Qarabağ”, “Qəbələ”, “Xəzər Lənkəran”, “Bakı”, “Sumqayıt” kimi premyer-liqa klublarında çıxış etsə də, son vaxtlar klubsuz idi.
Şirxan isə daha gənc idi. Həkimlərin bütün cəhdlərinə baxmayaraq, dünyasını dəyişdi. Ən müasir tibbi müdaxilələr belə həyatını xilas edə bilmədi. Görəsən, futbolçuya hansı diaqnoz qoyulmuşdu? ECMO aparatının effekt verməməsinin səbəbi nə olub? Müalicə dönəmində Şirxana hansı tibbi müdaxilələr edilib? Suallarımızı müdafiəçinin müalicə olunduğu “Liv Bona Dea” xəstəxanasının baş həkimi, ürək-damar cərrahı Cabir Gülmalıyevə ünvanladıq:
“Şirxanın halı pisləşəndən sonra ən yaxın xəstəxanalardan birinə aparılmışdı. Aprelin 22-si günün ikinci yarısında bizim hospitala köçürüldü. Futbolçuya ilkin sağlamlıq müayinələri tərəfimizdən həyata keçirilmədiyindən ürək və ağciyər damarlarının anjioqrafiyası və exokardioqrafiyasını gerçəkləşdirdik. Mərhumun ürək funksiyaları zamanla ciddi şəkildə pozulmuşdu. Gecə saatlarında ürək-ağciyər sisteminə dəstək olmaq məqsədilə ECMO cihazının qoşulmasına qərar verdik. Təəssüf ki, Şirxanın vəziyyəti həddən artıq ağır idi. Ən müasir avadanlıqların dəstəyi ilə reanimasiyada təqiblərimiz davam edirdi. Bir müddət sonra xəstəni ECMO cihazından ayırmaq istəsək də, alınmadı. Onu yenidən cihaza qoşmaq məcburiyyətində qaldıq. Mərhum son ana qədər orqanların normal vəziyyətdə işləməsini təmin edən cihaza qoşulu qaldı. Həqiqətən sözügedən orqanlar funksiyalarını icra edə bilməyəcək halda idi. Müşahidə olunan hər bir çatışmazlığa vaxtında müdaxilə etsək də, cəhdlərimiz effekt vermədi. Şirxanı itirdik. Allah rəhmət eləsin”.
Şirxan Həsənzadənin mövsüm ərzində keçdiyi tibbi yoxlamaların nəticələri haqda məlumatı isə “Qarabağ”ın mətbuat xidmətinin rəhbəri Gündüz Abbaszadədən aldıq:
“Bildiyiniz kimi, futbolçular müntəzəm “full check-up” müayinəsinən keçirilir. Bu zaman bütün orqanların sağlamlıq durumu aydın olur. Şirxan “Qarabağ”da həm mövsüm ərəfəsində, həm də qış fasiləsindən sonra bütün tibbi yoxlamalardan keçib. Bununla yanaşı, futbolçu bir neçə dəfə milliyə dəvət olunmuşdu. Bildiyiniz kimi, AFFA da düşərgəyə gələn oyunçuların sağlamlıq durumunu ciddi şəkildə yoxlayır. Onun durumunda həmin günə qədər (aprelin 22-si – red.) hansısa problem aşkarlanmamışdı”.
KƏNAN BAHADIR
Digər xəbərlər
