Mayın 8-də Klublar Komitəsinin iclası keçirildi. Tədbirdə AFFA prezidenti Rövnəq Abdullayev də iştirak etdi. Açıqlamalara inansaq, komitə üzvləri dövlətin ayırdığı 3 milyon manatın legionerlərə xərclənməməsi təklifinə qarşı çıxıb. Onlar AFFA rəhbərini bu fikrindən daşındırmaq istəyib. Ümumiyyətlə, toplantıda başverənlər haqda dəqiq məlumat almaq üçün qurumun baş katibi Sərxan Hacıyevlə əlaqə saxladıq.

"Football-plus.az" olaraq onunla məlum görüş və ölkə futbolunun gələcəyi barədə söhbətləşdik.
- Mayın 8-də Klublar Komitəsinin iclası keçirildi. Qurumun tarixində ilk dəfə federasiya prezidenti toplantıda iştirak etdi. İclasda nələr müzakirə olundu?
- Bəli, AFFA prezidenti ilə Klublar Komitəsinin üzvlərinin görüşü keçirildi. Əvvəlcədən onu qeyd edim ki, bu qurumun iclasında müzakirə olunan bütün məsələlər müntəzəm Rövnəq Abdullayevə çatdırılır. Həmin məlumat AFFA prezidentinin nəzərində olur. Son iclasda bir sıra məsələlər müzakirə olundu. Əsas məsələ dövlət tərəfindən ayrılan maliyyənin xərclənmə istiqaməti idi. Burda əsas müzakirə mövzusu legionerlərə xərclənən vəsaitlə bağlı idi. Amma onu qeyd edim ki, bununla bağlı konkret qərar yox idi. Yəni ümumi fikir mübadiləsi aparılmışdı. Belə bir ehtimal var idi. İclas zamanı da bununla bağlı müzakirəmiz oldu. Fikir mübadiləsi aparıldı. Həmçinin digər məsələlərlə bağlı klubların fikirləri dinlənildi. Düşünürəm ki, ümumi müzakirələrin sonunda səmərəli iclas oldu.

- Klublar Komitəsinin prezidenti Fariz Nəcəfovun açıqlamasından belə başa düşülür ki, klublar yekdilliklə dövlətin ayırdığı 3 milyon manatın legionerlərə xərclənilməməsi təklifinə qarşı çıxıb. Onların istəyi nəzə alınacaq?
- Əlbəttə, hər bir məsələylə bağlı Klublar Komitəsi ilə fikir mübadiləsi aparılıb. Müəyyən hallarda klubların fikirləri nəzərə alınır. Bəzən isə müəyyən fikirlər elə də məqsədəuyğun sayılmır. Sırf dövlət tərəfindən ayrılan vəsaitin legionerlərə xərclənməməsi ilə bağlı klubların mövqeyini öyrəndik. Onlar bununla bağlı bəyanat da vermişdi. Əlbəttə, klubların da bu yöndəki fikirləri dinlənildi və nəzərə alındı. Lakin bu məsələ ilə bağlı bundan öncə konkret qərar yox idi. Sadəcə, belə bir fikir səsləndirilmişdi və ehtimal var idi. Klublarla bu məsələ istiqamətində danışıqlar aparılırdı. Bunu rəhbərlik tapşırmışdı. Klublarla danışılandan sonra müəyyən bir istiqamət seçildi.

- Premyer-liqanın başa çatmasına 3 tur qalsa da, hələ də çempionun, avrokuboklara vəsiqə qazanan 4-cü komandanın və çempionatın sonuncusunun adı bəlli deyil. Rəqabətin bu həddə çatmasını AFFA və PFL-in uğuru adlandırmaq olar?
- Burda AFFA və PFL-in əsas uğuru kimi idman prinsiplərinin qorunmasının təmin olunmasını qeyd edə bilərəm. Bunun nəticəsində son turlar olmasına baxmayaraq, çempionat marağını və həyəcanını qoruyur. Klublar arasında rəqabət və həyəcan hiss olunur. Bu da həqiqətən hər bir istiqamətdə inkişafa gətirib çıxaracaq amildi.

- Mediada premyer-liqanın gələcəyi ilə bağlı fərqli fikirlər var. Çoxları düşünür ki, AFFA növbəti mövsüm üçün klubların sayını 12-yə çatdıracaq. Bunun reallaşması mümkündü?
- Bu gün bu məsələ gündəmdə deyil.

- Bir neçə gün öncə FİFA Hakimlər Komitəsinin sədri Pyerluici Kollina Azərbaycana səfər etmişdi. Bakı Olimpiya Stadionunda bizim referilərlə görüşdü. Bu haqda fikirləriniz maraqlıdı…
- Kollina kimi hakimin, həm də FİFA Hakimlər Komitəsinin sədrinin bizim referilərlə görüşü, əlbəttə, ancaq müsbət hal ola bilər. Belə təmasın olması yalnız müsbət mənada qiymətləndirilməlidi. AFFA olaraq çalışmalıyıq ki, gələcəkdə belə görüşlərin və təmasların sayı artırılsın. Bu səbəbdən də görüşü yüksək qiymətləndirirəm. Bunu da qeyd edim ki, AFFA və FİFA prezidentləri görüşərkən Rövnəq Abdullayev tərəfindən Kollinanın bizim hakimlərlə görüşünün təşkil olunması xahiş edilmişdi.

- Son turlarda müntəzəm hakim səhvləri qeydə alınır. Bu məsələ sizi nə dərəcədə narahat edir?
- Əlbəttə, hakim səhvləri bizi narahat etməyə bilməz. Belə halların baş verdiyini görərkən Hakimlər Komitəsi ilə müzakirələr aparırıq. Çalışırıq ki, bunun qarşısının alınması yönündə müəyyən addımlar ataq. Qeyd etdiyim kimi, bizi belə məsələlər narahat edir. Bunun azalması istiqamətində də müəyyən addımlar atırıq.

İLKİN SULTANLI