Aprelin 13-də Avropa Liqasının (AL) 1/4 finalına start verildi. İlk oyunlar qonaqların qələbə qazana bilməməsi ilə daha çox yadda qaldı: ev sahiblərindən ikisi minimal hesabla qalib gəldi, iki matç isə məhsuldar heç-heçə ilə nəticələndi.

"Football-plus.az" xəbər verir ki, qrup mərhələsində “Real Sosyedad”la (0:1, 1:0) oynayan, pley-offda “Barselona”nı (2:2, 2:1), 1/8 finalda “Betis”i (4:1, 1:0) mübarizədən kənarlaşdıran “Mançester Yunayted” İspaniyanın daha bir klubuna qarşı oynamağa məcburdu. Erik ten Haqın komandası evdə “Sevilya”nı məğlub etməyə çox yaxın idi. Aparıcı hücumçusu Reşfordu zədə üzündən qeyri-müəyyən müddətə itirən “qırmızı şeytanlar”ın yarımmüdafiəçisi Zabitser ilk hissədə dubl etməklə komandasına lazımi üstünlük qazandırdı. İkinci hissə də meydan sahiblərinin oyuna nəzarəti ilə keçdi. Lakin fasilədən sonra Ten Haqın artıq 4 əvəzləməyə əl atması MY-nin hücum potensialına mənfi təsir etməyə başladı. Zaman onun oyunçuları bir qədər erkən əvəzlədiyini göstərdi. Tədricən üstünlüyü ələ alan qonaqlar istəyinə son dəqiqələrdə çatdılar. Navasın ötürməsinə uğursuz müdaxilə edən Malasia topu öz qapısına yönəltdi. Az sonra Martinesin zədələnməsi “Yunayted”in meydanda on nəfərlə qalmasına səbəb oldu. Bundan ruhlanan sevilyalılar hücumları davam etdirdilər və maraqlıdı ki, bu dəfə Maquayr Ən-Nəsirinin zərbəsinə uğursuz toxuşunuş etməklə avtoqola səbəbkar oldu. Beləliklə, “Old Trafford”da vurulan 4 qolun hamısı ev sahiblərinin adına yazıldı. Amma MY 2:2 hesabına razılaşmalı oldu...

Rotterdamdakı matçı maraqla gözləməyə dəyərdi. Yerli “Feyenoord” Konfrans Liqasının finalında 0:1 hesabıyla uduzduğu “Roma”dan qisas almaq üçün gözəl fürsət yaxalayıb. Ötən ilin noyabrından məğlubiyyət üzü görməyən Arne Slotun komandası hazırda Niderland çempionatında liderlik edir. “Feyenoord” avrokuboklardakı 4-cü cəhdində “Roma”ya ilk dəfə qalib gəldi. Amma nəticə fərqli ola bilərdi. İlk hissənin sonunda Viffer cərimə meydançasında topa əllə toxunmaqla qonaqlara penalti qazandırdı. Ancaq Pelleqrini topu dirəyə vurdu. Joze Mourinyo fasilədə onu əvəzləməyi lazım bildi. Romalıların baş məşqçisinin zədə üzündən ilk hissədə Dibala, fasilədən sonra isə Abraham kimi aparıcı hücumçuları itirdiyini də bildirək. Bu əvəzləmələr, sözsüz, italiyalıların ön xəttini kasadlaşdırdı. Viffer 54-cü dəqiqədə hesabı açmaqla penalti epizodunda yol verdiyi səhvi “sığortaladı”. Qonaq komanda dərhal cavab qounu vura bilərdi. Lakin İdrissi topu qapı xətti üzərindən çıxardı. Sona yaxın hesabı qorumaq üçün oynayan “Feyenoord” minimal hesabla qalib gəldi.

1/8 finalda İngiltərə çempionatında liderlik edən “Arsenal”ı mübarizəni dayandırmağa vadar edən “Sportinq”in İtaliyaya səfəri uğursuz alındı. Halbuki Ruben Amorimin çalışdırdığı komanda oyun planında “Yuventus”dan yaxşı təsir bağışladı. Portuqaliyalılar qol şanslarından istifadə edə bilməməyin cəzasını çəkdilər. Turinlilərin minimal hesabla qalib gəlməsində son dəqiqələrdə iki seyv edən qapıçı Perinin böyük rolu oldu.

Avrokubokların debütantı olan “Yunion” daha bir mərhələ keçmək yolunda növbəti addımı atdı. Əvvəlki mərhələdə “Union”a üstün gələn (3:3, 3:0) Belçika klubu Almaniyanın digər təmsilçisi ilə ilk oyunda da qənaətbəxş nəticəyə nail oldu. “Bayer-04” ilə səfərdə qələbəni son dəqiqələrdə əldən verən “Yunion” 1:1 hesablı heç-heçə ilə turnirdə mövsümün kəşfi olduğunu bir daha göstərdi.