Aprelin 13-də keçirilən oyunlarla Konfrans Liqasının (KL) 1/4 finalı başladı.

“Football-plus.az” xəbər verir ki, ilk matçlarda meydan amili baxımından hər cür nəticə qeydə alındı: ev sahibləri meydanı bir qələbə, məğlubiyyət və iki heç-heçə ilə tərk etdilər.

Avropanın ikinci mövsümü təşkil edilən “üçüncü dərəcəli” klub turnirinin favoritlərindən sayılan “Vest Hem”in Belçikaya səfəri asan olmadı. Qeyd edək ki, londonlular “Gent”lə oyuna qədər avrokuboklarda ardıcıl 10 qələbə qazanmaqla öz rekordunu yeniləmişdilər. Maraqlıdı ki, İngiltərə klubu qitə kuboklarında ilk matçını məhz 1964-cü ildə belçikalılara qarşı keçirmişdi. Onda “Lya Qontuaze” adlanan komandanı mübarizədən kənarlaşdıran “çəkicdöyənlər” sonda Kuboklar Kubokunun qalibi olmuşdular. Nəhayət, “Vest Hem”i bu mövsüm büdrədən tapıldı. Pley-offda “Qarabağ”a yalnız penalti seriyası ilə üstün gələn “Gent” sonra “İstanbul BŞ”ni (1:1, 4:1) təsadüfən mübarizədən kənarlaşdırmadığını bir daha göstərdi. Fasilə ərəfəsində qapısında qol görən Heyn Vanhazebrukun komandası ikinci hissədə rəqibinə çətin anlar yaşatdı. Lakin çox üstün futbol sərgiləməsinə baxmayaraq, gentlilərin qisməti heç-heçə oldu - 1:1.
“Lex” KL-də keçirdiyi son 5 matçda qapısından top buraxmamış və məntiqi olaraq 8 ən güclü komanda sırasına çıxmışdı. Con van den Bromun komandasının seriyasını Kabral qırdı. İtaliyanın bu mərhələdə iştirak edən yeganə təmsilşisi olan “Fiorentina”nın hücumçusu cari mövsümdə 6-cı qolunu vurdu. Braziliyalı futbolçu bununla da ən yaxşı bombardirlərin siyahısına başçılıq edən serbiyalı oyundaşına çatdı. Poznanlılar hissənin ortalarında hesabı bərabərləşdirsələr də, ikinci hissədə rəqibin üstün oyunu qarşısında aciz qaldılar. Polşada 4:1 hesabı ilə qələbə qazanan florensiyalılar praktiki olaraq yarımfinaldakı rəqibi haqda düşünə bilərlər.
Əvvəlki mərhələdə İtaliyanın daha bir təmsilçisi “Latsio”ya hər iki matçda 2:1 hesabı ilə qalib gələn “Alkmaar” üçün Belçikaya səfər uğursuz alındı. Yerli “Anderlext” 1/8 finalda “Vilyarreal”ı (1:1, 1:0) təsadüfən mübarizədən kənarlaşdırmadığını sübut etdi. Brüssellilər bu mövsüm ölkə çempionatında qənaətbəxş nəticə göstərə bilməsələr də, rəqibini iki cavabsız qolla məğlub etdilər.

“Nitsa”nın Bazelə səfərinin asan olmayacağı gözlənilirdi. Eyniadlı komanda ilə ilk oyun məhsuldar “sülh”lə nəticələndi - 2:2. Ev sahiblərindən Amduni, qonaqlardan isə Moffi dubl etdi.