Xəbər verdiyimiz kimi dünən ''Ülkər'' stadionunda ''Fənərbaxça'' Rusiyanın son illərdəki dəyişməz çempionu ''Zenit''lə qarşılaşdı.

Oyun həm hazırlıq, həm də xeyriyyə məqsədi daşıyırdı. Belə ki, qarşılaşman əldə olunan gəlir Türkiyədəki zəlzələnin qurbanlarına göndəriləcəkdi.

"Football-plus.az" xəbər verir ki, təxminən 15 minə yaxın fanatın izlədiyi qarşılaşmada zaman-zaman gərgin anların yaşanması diqqətdən qaçmadı. Hətta iki klubun fanatları arasında çaxnaşma baş verdi. Nəticədə ''Zenit''in bir neçə azarkeşi həbs olundu. Oyun özü isə kifayət qədər maraqlı və məhsuldar alındı. Təbii ki, yığma pəncərəsi olduğundan hər iki komanda oyuna əsas heyətlə çıxmamışdı. Amma ''Fənər''in itkiləri daha çox idi. İlk ''11-lik''də əsas heyət üzvü sayılanlardan yalnız Migel Krespo və Sərdar Əziz var idi.

Meydan sahibləri artıq 7-ci dəqiqədə Mərt Hakan Yandaşla hesabı açdılar. Amma ''Zenit'' fasiləyə qədər nəinki bərabərlik qolunu vurdu, hətta hesabda önə də keçdi. Əvvəlcə braziliyalı ulduz Malkom penaltini dəqiq yerinə yetirdisə, fasilə ərəfəsində daha bir braziliyalı Klaudinyo topu uzaq küncə göndərdi. Bu iki qolun arasında ''Fənər''in önə keçmək üçün gözəl fürsəti var idi. Amma gəldiyi gündən bu yana heç cür ümidləri doğrulda bilməyən Joao Pedro penaltidən yararlana bilmədi. Bununla belə İstanbul nəhəngi ikinci hissənin ortalarında məğlubiyyətdən qurtulmağı bacardı. 62-ci dəqiqədə oyuna daxil olan Bora Aydınlık 6 dəqiqə sonra uzaq məsafədən mükəmməl zərbə ilə yekun nəticəni müəyyənləşdirdi. ''Fənər''in öz yetirməsi olan Boranın 18 yaşı mayda tamam olacaq. O, U-19 komandasının üzvüdü və əsas komandada ilk oyununa çıxdı. Buna baxmayaraq həm vurduğu qol, həm də öz oyunu ilə alqış qazandı.