Türkiyə çempionatında dünən keçirilən 3 qarşılaşma ilə birinci tura yekun vuruldu.

"Football-plus.az" xəbər verir ki, ''Beşiktaş'' və ''Qalatasaray''dan fərqli olaraq ''Fənərbaxça'' mövsümə qələbə ilə başlaya bilmədi. Tarixində ilk dəfə elitada oynayan ''Ümraniyəspor''u qəbul edən ''Fənər'' aşkar favorit statusunu doğrulda bilmədi. Jorje Jezuşun kollektivi ilk yarını Valensiyanın dublu sayəsində 2:1 öndə tamamladı. Amma ikinci yarıda müdafiədəki inamsız oyun qonaqların nəinki bərabərlik qolunu vurmasına, hətta hesabda önə keçməsinə səbəb oldu. ''Sarı-lacivərdlilər'' məğlubiyyətdən yalnız son anlarda qurtuldular. Əsas vaxta olunmuş 2-ci dəqiqədə Berişa yekun nəticəni müəyyənləşdirdi – 3:3. Xal itkisinə baxmayaraq iki fakt diqqət çəkir. Jezuşun çalışdırdığı komandanın mövsümə xal itkisi ilə başlamasına sonuncu dəfə 2013/14-də təsadüf olunub. Həmin vaxt ''Benfika'' ''Maritimu''ya yenilmişdi (1:2). Amma maraqlısı odu ki, ''Benfika'' həmin mövsüm çempion olmuşdu.

Bundan başqa ''Fənərbaxça''nın birinci turda 3 qol buraxması sonuncu dəfə 2013/14-də ''Konyaspor''la oyunda (2:3) baş vermişdi. Həmin mövsüm məhz elə ''Fənər''in çempionluğu ilə yekunlaşmışdı!