Türkiyə təmsilçiləri növbəti yoxlama matçlarını keçiriblər.

Football-plus.az xəbər verir ki, Klublar Birliyi vəqfinin La Liqa ilə işbirliyi sayəsində təşkil olunan dostluq turnirində İstanbul nəhəngləri yenə İspaniya klubları ilə qarşılaşıblar. Noyabrın 30-da “Ülkər”də “Fənərbaxça”ya 1:3 hesabıyla məğlub olan “Rayo Valyekano” dekabrın 3-də “Nef Stadionu”nda “Qalatasaray”la qarşılaşıb. Təbii ki, “Cim-Bom” meydana əsas heyətlə çıxa bilməyib. Komandanın 5 oyunçusu mundiala yollanıbsa, Oliveyra ilə İkardi zədələnərək sıradan çıxıb. Kərəm Aktürkoğlu da bu görüşdə iştirak etməyib. Okan Burukun əlinin altındakı oyunçular isə ümidləri doğrultmayıblar. Nəticədə Andres Martinin 34-cü dəqiqədə vurduğu qol oyunda yeganə olub və “sarı-qırmızılar” minimal hesabla məğlub olublar. “Qalatasaray” növbəti oyununu bu gün “Vilyarreal”a qarşı keçirəcək. “Vilyarreal” isə dekabrın 3-də “Fənər”in qonağı olub. “Sarı-lacivərdlilər” “Rayo Valyekano” ilə qarşılaşmada olduğu kimi, yenə ilk yarının ortalarında qol buraxandan sonra əzmkar qələbə qazanıblar. Etyen Kapu 24-cü dəqiqədə ispanları önə keçirsə də, 31-ci dəqiqədə “Fənər”in bu mövsüm unudulan və gözdən düşən qolçusu Sərdar Dursun özü qazandığı penaltini dəqiq yerinə yetirib. Joao Pedronun ağır zədə alaraq uzun müddətə sıradan çıxdığını nəzərə alsaq, Sərdar Dursunun bundan sonra artıq daha çox şans qazanacağını güman etmək olar. Qələbə qolunu isə 78-ci dəqiqədə Mərt Hakan Yandaşın ötürməsi ilə Coşua Kinq vurub. “Fənər” növbəti yoxlama oyununu sabah “Alanyaspor”a qarşı keçirəcək.

Acun Ilıcalının sahibi olduğu “Hall Siti”nin Antalya toplanışı başa çatıb. Çempionşip təmsilçisi vətəninə qayıtmaq ərəfəsində Antalyada ikinci oyununu da keçirdi. İlk görüşdə “İstanbul BŞ” ilə 1:1 bərabərə qalan “pələnglər”in “Trabzonspor”a qarşı oyununda da eyni hesab qeydə alındı. Trezeqe 4-cü dəqiqədə qaradənizliləri hesabda önə keçirsə də, 71-ci dəqiqədə ingilislərin türkiyəli legioneri Ozan Tufan penaltini dəqiq yerinə yetirməklə yekun nəticəni müəyyənləşdirdi. Qeyd edək ki, Acun İngiltərədən gəlmiş “Hall Siti”nin 320 fanatı üçün Antalyanın “Grand Park Lara Hotel” adlı 4 ulduzlu otelində birhəftəlik unudulmaz istirahət təşkil edərək onların bütün xərclərini üzərinə götürdü! “Beşiktaş” isə “Vodafon Park”da “Fatih Karagümrük”lə qarşılaşdı. “İstanbulspor”u 4 cavabsız qolla darmadağın edən “Qartal” bu dəfə 1:1-lik bərabərliklə kifayətləndi. Təcrübəli Kolin Kazım 33-cü dəqiqədə qonaqları hesabda önə keçirsə də, Kərəm Kəsgin sona 5 dəqiqə qalmış “Beşiktaş”ı məğlubiyyətdən xilas etdi. Qeyd edək ki, “ağ-qaralar” dünən toplanış üçün Antalyaya yollanıb. Komanda burda iki Belçika təmsilçisi – “Şarlerua” və “Vesterlo”, eləcə də “Girəsunspor” ilə yoxlama oyunu keçirəcək.

ƏLİ