Almaniya futbolunun flaqmanı ''Bavariya'' ilə bağlı sürpriz xəbərlər var.

"Football-plus.az" xəbər verir ki, dünən axşam saatlarında məlum oldu ki, Yulian Naqelsmannın işindən narazı qalan rəhbərlik onunla yolları ayırmaq qərarına gəlib! Bu məlumatı ilk öncə adətən xəbərləri düz çıxan italiyalı jurnalist Fabrisio Romano paylaşdı. Daha sonra Almaniyanın məhşur ''Bild'' və ''Kikker'' nəşrləri də xəbəri təsdiqlədilər. Düzdü, Naqelsmannın qovula biləcəyi haqda şaiyələr çoxdan var idi. Amma bunun məhz indi - ''Der Klassiker'' qabağı baş verəcəyini az adam proqnozlaşdırardı. Üstəlik martın 22-də Naqelsmann ''FourFourTwo'' nəşri tərəfindən 40 yaşa qədər məşqçilər arasında dünyada ən yaxşı mütəxəssis seçilmişdisə, martın 21-də münhenlilərin prezidenti Herbert Hayner 35 yaşlı çalışdırıcıya təriflər yağdırmışdı. Düşünmək olardı ki, ÇL-in 1/4 finalında PSJ ilə dueldə əldə olunan inamlı qələbə Naqelsmannın mövqeyini möhkəmləndirəcək. Amma ''Skay Sport''un versiyasına görə ''Bavariya''nın bundesliqada prinsipial rəqib Dortmund ''Borussiya''sını özündən irəli buraxması həlledici olub. Çünki qış fasiləsindən öncə ''rekordmayster'' ''Borussiya''dan 9 xal qabaq idi.

Bundan başqa rəhbərliyin fikrincə, Naqelsmannın ilyarımdan artıq davam edən dönəmində heç bir futbolçuda inkişaf hiss olunmayıb. Və nəhayət, bu yığma fasiləsində gənc mütəxəssisin xizək sürmək üçün Avstriyaya yollanması da rəhbərliyin xoşuna gəlməyib. Halbuki bəzi futbolçular bazaya gələrək fərdi məşqlərini davam etdiriblər. Şaiyələrə inansaq, artıq yeni məşqçinin adı bəllidi. Bu, Tomas Tuxeldi. Bu mütəxəssisin klubun inkişafı ilə bağlı təqdim etdiyi plan rəhbərliyin xoşuna gəlib. Çox motivasiyalı və istəkli görünən Tuxel bazar ertəsindən etibarən yeni işinə başlayacaq.

Maraqlıdı ki, Tuxel ardıcıl 2-ci dəfə yeni klubunda ilk cəhddən ÇL-i qazana bilər. 2020/21-də o, mövsümün gedişində ''Çelsi''də Frenk Lempardı əvəzləmiş və londonluları ÇL-in qalibi etmişdi. Elə ''Bavariya'' özü də sonuncu dəfə mövsümün gedişində məşqçi dəyişərkən həmin ''futbol ili''ni ÇL-in qalibi kimi başa vurmuşdu. Söhbət 2019/20-dən gedir. Həmin vaxt Niko Kovaçı Hans-Diter Flik əvəzləmişdi. Naqelsmanna gəlincə, o, ''Bavariya'' 1 çempionluq, 2 ölkə superkuboku olmaqla 3 titul qazandı. Komanda ötən mövsüm ÇL-də ''Vilyarreal''a uduzaraq mübarizəni 1/4 finalda dayandırmışdı.