Jezuş pley-off tələb etdi, TFF ''olmaz'' dedi
Avropa Liqasının 1/8 finalı çərçivəsində ''Sevilya'' ilə oyuna hazırlaşan ''Fənərbaxça''da baş məşqçi Jorje Jezuş vətəni Portuqaliya mətbuatına diqqətçəkən açıqlamalar verib.
Bilindiyi kimi Türkiyədə baş verən dəhşətli zəlzələdən sonra ''Hatayspor'' və ''Qaziantep'' superliqadan çəkilmək qərarına gəldi. Qalan turlarda onların rəqiblərinə texniki qələbələr veriləcək. Jezuş isə iddia edir ki, Türkiyə Futbol Federasiyasının bu qərarı yanlışdı. Bundan başqa təcrübəli mütəxəssisin fikrincə, bu mövsüm superliqada pley-off tətbiq olunmalıdı:
''Təbii ki, futbol baş vermiş faciədən önəmli deyil. Amma fakt budu ki, iki komandanın çəkilməsi ilə turnir cədvəli də alt-üst oldu. Alternativ variant nədi? Futbolda xallar meydanda qazanılır. Ona görə də mövsümün qalan hissəsində ''Hatayspor'' və ''Qaziantep''in rəqiblərinə texniki qələbə verilməməlidi. Bu oyunlar ləğv edilmiş kimi qəbul olunmalıdı. Bundan başqa, fikrimcə, mövsümün sonunda ilk 4 klub arasında pley-off qarşılaşmaları keçirilməlidi. Amma belə bir variantın qüvvəyə minib-minməyəcəyini deyə bilmərəm''.
Daha öncə ''Beşiktaş'' cəbhəsi də bu mövzuda öz fikrini ortaya qoymuşdu. Prezident Ahmet Nur Çebi iddia etmişdi ki, ''Hatayspor'' və ''Qaziantep''in ümumiyyətlə mövsümün əvvəlindən bəri keçirdiyi bütün oyunların nəticələri ləğv olunmalıdı. Amma Çəbi bu açıqlamasından sonra futbol ictimaiyyətinin qınağına tuş gəlmişdi. Camaat həyat uğrunda mübarizə apardığı bir məqamda Çəbi ''Beşiktaş''ın maraqlarını güdməkdə günahlandırılmışdı. Çünki ''ağ-qaralar'' ilk dövrədə ''Hatayspor'' və ''Qaziantep''lə oyunlarda ümumilikdə 5 xal itirmişdi.
Bu arada TFF-nın Jezuşun təklifinə cavabı gecikməyib. Federasiya prezidenti Mehmet Büyükekşi pley-offun gündəmlərində olmadığını bildirərək bunları deyib:
''Bu mövsüm çempionatımızda pley-offun olması mümkün deyil. Bu məsələ ümumiyyətlə gündəmimizdə yoxdu. Həm də mövsüm davam edərkən qaydaları dəyişmək nə dərəcədə düzgündü? Matç davam etdiyi müddətdə, məsələn, 70-ci dəqiqədə oyunu saxlayıb oyun qaydalarını dəyişmək olarmı? Belə şey mümkün deyil. Mövsüm hansı qaydalarla başlayıbsa, o cür da başa çatacaq''.
Digər xəbərlər
