Zəlzələ üzündən təxminən 1 aylıq məcburi fasilə yaranan Türkiyə çempionatı ilə bağlı srağagün ortaya maraqlı bir iddia atıldı.

Bu iddiaya görə Klublar Birliyinin son toplantısında “Beşiktaş” prezidenti Ahmet Nur Çəbi bu mövsüm superliqada pley-off sisteminin tətbiqini tələb edibmiş. “Sözcü” nəşrinin versiyasına görə Çəbi “Hatayspor”la “Qaziantep”in superliqadan çəkildiyini və bunun rəqabətə mənfi təsir göstərdiyini əsas gətirərək, çempionun pley-offla müəyyənləşməsini istəyibmiş. Xəbərin davamında qeyd olunurdu ki, superliqa klublarının böyük əksəriyyəti bu ideyanı dəstəkləsə də, turnir cədvəlinin ilk 2 pilləsində qərarlaşan “Qalatasaray”la “Fənərbaxça” təkliflə razılaşmayıb. Xatırladaq ki, daha öncə pley-off 2011/12 mövsümündə tətbiq olunmuşdu. 2011-in yayında yaşanan danışılmış oyunlarla bağlı böyük qalmaqalın kölgəsində baş tutan həmin mövsümün sonunda ilk 4 pillədə qərarlaşan “Qalatasaray”, “Fənərbaxça”, “Trabzonspor” və “Beşiktaş” arasında əlavə pley-off oyunları keçirilmişdi. Normal mövsümü 1-ci pillədə tamamlayan “Qalatasaray” pley-offda da üstünlüyü əldən verməyərək tarixinin 18-ci çempionluğunu qazanmışdı. Amma bu dəfə ortaya atılan iddia hərtərəfli təkzib olundu. “Beşiktaş” rəsmi saytında bəyanat yayaraq Ahmet Nur Çəbinin pley-off sistemini təklif etməsi barədə şayiələri təkzib etdi. Başqanın KB-nin son toplantısında qətiyyən belə bir fikir irəli sürmədiyi qeyd olunan bəyanatda belə xəbərlərə etibar edilməməsi məsləhət görüldü. Əslində vaxt cəhətdən də bu mövsüm belə bir şeyin həyata keçməsi mümkün deyil. Çünki mövsüm onsuz da məcburi şəkildə iyunun əvvəllərinə qədər uzanacaq. İyunun 10-da isə bilindiyi kimi, İstanbulda Çempionlar Liqasının finalı nəzərdə tutulub. UEFA Türkiyə Futbol Federasiyasından (TFF) həmin tarixə qədər mövsümü başa çatdırmağı tələb edib.

Bu arada dünən TFF prezidenti Mehmet Büyükekşi də məsələyə münasibət bildirib: