Türkiyədə baş verən dəhşətli zəlzələdə dünyasını dəyişənlərin sayı artıq 36 mini ötüb.

Zəlzələnin baş verdiyi bölgələrdə yenə də vəziyyət çox ağırdı. Ölkədə idman başda olmaqla bir çox sahədə müvəqqəti durğunluq yaranıb. Nəyin necə olacağı bilinmir. Ona görə də Türkiyə Futbol Federasiyası (TFF) tez-tez yeni qərarlar qəbul etməli olur.

Ötən sayımızda mövsümün sonuna qədər rəsmi şəkildə çıxışını dayandıran klubların adlarını açıqlamışdıq. Elita klublarından “Hatayspor”la “Qaziantep”, 1-ci liqa klublarından “Yeni Malatyaspor”la “Adanaspor” çəkilmək qərarına gəlmişdi. Onlar səviyyəcə daha aşağı liqaya göndərilməyəcəklər və gələn mövsümdən elə əvvəlki liqada çıxışlarını davam etdirəcəklər. Bundan başqa, federasiyanın qərarı ilə çıxışını dayandıran kollektivlərin oyunçularının başqa klublara keçidinə icazə verilmişdi. Hətta “Hatayspor” və “Qaziantep”dən oyunçu alan klublar üçün legioner limiti baxımından güzəşt olunacağı da açıqlanmışdı. TFF-nin bu qərarından sonra, gözlənildiyi kimi, Türkiyə nəhəngləri Hatay və Qaziantep təmsilçisinin üzvlərinə təkliflər göndərməyə başladılar. Çünki bu klublarda həqiqətən də maraqlı futbolçular çıxış edirdi. Məsələn, anteplilərin braziliyalı üzvü Joao Fiqeyredonu 650 min avro və sonrakı satışdan 15 faiz pay şərti ilə dərhal “İstanbul BŞ” “qapdı”. Başakşəhərlilər Mustafa Eskihellaça da göz qoyublar. “Qaziantep”in əsas “yağlı tikəsi” – rumıniyalı ulduz Aleksandru Maksimi, çox güman, “Beşiktaş” “oğurlayacaq”. Tərəflərin 2 milyon avro qarşılığında anlaşdığı iddia olunur. “Qartal” son mundialda Kanada yığmasının heyətində yer alan “Hatayspor”lu Sem Adekuqbe ilə də danışıqlar aparır. “Qaziantep”in serbiyalı ulduzu Lazar Markoviç mövsümün sonuna qədər icarə əsasında “Trabzonspor”da çıxış edəcək. Qaradənizlilər son iki mövsumda 53 superliqa matçında 26 qol vuran “Hatayspor”un mərakeşli forvardı Əyub Əl-Kaabi ilə də maraqlanır. “Qalatasaray” “Qaziantep”in iki üzvü - Papi Ciloboci və qapıçı Günay Güvənc ilə danışıqlar aparır. Xüsusilə də Fernando Musleranın 4-5 həftəliyə sıradan çıxdığını nəzərə alsaq, “Cim-Bom” üçün qapıçı transfer anlaşılandı. “Fənərbaxça” isə gözünü “Hatayspor”un gənc və istedadlı forvardı Bertuğ Yıldırıma dikib. Hataylıların baş məşqçisi Volkan Dəmirəlin “yerli Holann” adlandırdığı 20 yaşlı bu hücumçunun gələcəyi çox parlaq görünür. “Fənər” bu futbolçunu mövsümün sonuna qədər icarəyə götürmək niyyətindədi.

Yeri gəlmişkən, bir məqamı da qeyd edək. Bilindiyi kimi, TFF Türkiyədə normal şərtlər altında fevralın 8-i bağlanmalı olan “transfer pəncərəsi”ni UEFA-nın icazəsi ilə fevralın 18-nə qədər uzatmışdı. Maraqlıdı ki, qurum “pəncərə”nin bir qədər də davam etməsi üçün ikinci dəfə UEFA-ya rəsmi məktub göndərib. TFF bu dəfə transfer dövrünün martın 5-nə qədər uzadılmasını istəyir. Bundan başqa, türkiyəli bir məşqçinin mövsümün gedişində ikidən artıq klub çalışdırmasına icazə verilmirdi. TFF bu qərarı da dəyişib və artıq yerli məşqçiyə bir mövsümdə 3 klub çalışdırmağa icazə verilir.