Çox zəif mövsüm keçirən və fanatlarına iztirab yaşadan ''Trabzonspor''dan növbəti şok xəbər gəlib.

Bilindiyi kimi martın 3-də başqan Ahmet Ağaoğlu istefa vermiş, martın 4-də isə evdə debütant ''Ümraniyəspor''a məğlubiyyətin ardından son çempionun evdəki 36 oyunluq məğlubiyyətsiz seriyası qırılmışdı. Dünən, martın 7-də isə baş məşqçi Abdulla Avcı da istefa verdi! Vitse-prezident Ərtuğrul Doğan ilə görüşərək təzminat məsələsini həll edən və klubdan heç bir pul tələb etməyən təcrübəli mütəxəssis sosial şəbəkədəki səhifəsində duyğusal bir vida məktubu yazaraq istefasını rəsmən açıqladı. Xatırladaq ki, Avcı bu vəzifəyə 2020-ci ilin noyabrında gəlmişdi. Fanatlar üçün bu məşqçinin həmişə xüsusi yeri olacaq. Çünki ''Trabzonspor'' ötən mövsüm məhz Avcının başçılığı altında 38 illik həsrətə son qoyaraq tarixinin 7-ci çempionluğunu qazandı. Geridə qalan 28 ay ərzində komanda çempionluqdan savayı 2 dəfə ölkə superkubokuna da sahib çıxdı. Ümumilikdə ''Trabzonspor'' Avcının dönəmində keçirdiyi 116 rəsmi oyundan 65 qələbə, 29 heç-heçə, 22 məğlubiyyətlə ayrılmış oldu. Namizədlərə gəlincə, hələ ki, Sərgən Yalçının adı ön plana çıxır. Amma İlhan Palut və hazırda ''Kayserispor''u çalışdıran Çağdaş Atanın da adı hallanır.