“Qalatasaray” heyətini yeni oyunçu ilə gücləndirib.

İnamla turnir cədvəlinə başçılıq edən “Cim-Bom” zəlzələ üzündən superliqadan çəkilən “Hatayspor”lu Sem Adekuqbeni mövsümün sonuna qədər icarəyə götürüb. “Aslan” Patrik van Anholtla yollarını ayırdığından sol müdafiəçi axtarışında idi və həmin mövqeni məhz Adekuqbe ilə gücləndirib.

“Sarı-qırmızılar” bu oyunçunu daimi əsasda transfer edə bilmək hüququnu da ələ keçiriblər. Komanda bu maddədən yararlanmaq istəsə, 4 aydan sonra “Hatayspor”a 1 milyon avro ödəməli olacaq. Keçidin digər detalları barədə məlumat verilmir. Qeyd edək ki, daha öncə “Vankuver”, “Brayton”, “Höteborq” və “Valerenqanın” şərəfini qorumuş 28 yaşlı kanadalı futbolçu “Hatayspor”a 2021-in yayında 400 min avro qarşılığında transfer olunmuşdu. İndiyə qədər klub karyerasında 192 oyuna çıxaraq 2 qol vuran Adekuqbe Kanada yığmasında 38 oyun keçirib. “Hatayspor”la 2024-ə qədər müqaviləsi olan bu futbolçu son mundialda Kanada yığmasının heyətində yer almış və 1-i start heyətində olmaqla qrup mərhələsindəki hər 3 qarşılaşmada meydana çıxmışdı. Adekuqbe ilə “Beşiktaş” da yaxından maraqlanırdı. Amma o, üstünlüyü “Qalatasaray”a verib.

Yeri gəlmişkən, “Cim-Bom”un “Qaziantep”in kapitanı və əsas qapıçısı Günay Güvənçi də transfer edəcəyi gözlənilirdi. Fernando Muslera 4-5 həftəliyə sıradan çıxdığından təcrübəli qapıçının icarə əsasında “sarı-qırmızılar”a keçməsi gündəmdə idi. Özü də anteplilər heç bir məbləğ tələb etmirdilər. Amma İstanbul nəhəngi nədənsə bu qapıçıdan vaz keçmək qərarına gəldi. Ona görə də Güvənç icarə əsasında “Kasımpaşa”ya qismət oldu. Almaniyada doğulan və 2014-16-cı illərdə “Beşiktaş”ın şərəfini qoruyan 31 yaşlı əlcək sahibi 2018-dən bəri “Qaziantep”də çıxış edir.

Onun mövsümün sonunda bu kluba qayıdacağı gözlənilir. Bu mövsüm təcrübəli qapıçı 23 rəsmi qarşılaşmanın üçündə qapısını toxunulmaz saxlayıb.