Son vaxtlar “Turan Tovuz”u məğlub etmək heç də asan deyildi.

Hələ ötən yazılarımdan birində qərb klubunun yüksək əhval-ruhiyyədə olmasından yazmışdım. Ayxan Abbasov onsuz da Azərbaycan çempionatı üçün yaxşı heyətə sahibdi. Görünən odu ki, klub rəhbərliyi mövsümün əvvəlindən qarşıya konkret hədəflər qoyub. Başqa yerdə təəccüblənərlər ki, bir peşəkar komandanın avtobusu olmasın, nəqliyyat vasitəsi almaq üçün azarkeşlərdən pul toplansın, amma həmin komandanın heyətində 9 legioner olsun. Belə çıxır ki, klubun büdcəsində pul var imiş, onu da legioner alınması üçün sərf ediblər, avtobus almağı lazım bilməyiblər. Bu öz yerində, sözümün canı başqadı. Onu deyirdim ki, “Turan Tovuz” çempionatın səviyyəsinə baxanda heç də zəif heyətə sahib deyil. Bu səbəbdən də Ayxan Abbasovun komandası səfərdə də, evdə də yaxşı oynayır. Xüsusən də doğma meydanda tovuzluların kürəyini yerə vurmaq heç də asan deyil.

Özü də indiki məqamda. “Turan Tovuz”a sponsor tapılması komandanın düşərgəsində əməlli-başlı canlanma yaradıb, futbolçuların mübarizə əzmi azı iki dəfə artıb. Bu da səbəbsiz deyil. İllərini futbola verən adamlar başa düşür ki, büdcə çoxaldıqca futbolçulara təklif edilən məvacib də artacaq. Klub rəhbərliyi daha yaxşı maliyyə imkanları ilə başqalarına “elçi düşə” bilər. Çalışıb onlardan daha yaxşı olduğunu isbatlamalısan ki, yenilənəcək heyətdə özünə yer edəsən, artan məvaciblərdən sənə də pay düşsün. Təsadüfi deyil ki, son üç turda “Turan Tovuz” qələbə qazanmışdı. Həmin üç oyunun ikisi xüsusi əhəmiyyət kəsb edirdi. Çünki rəqiblərdən biri “Kəpəz” idi. Bu iki komandanın görüşünə “qərb derbisi” adı ona görə qoyulub ki, onların arasında prinsip var, həmişə bir-biri ilə mübarizə aparıblar. Ona görə də “Kəpəz”lə görüşdə qələbə “Turan Tovuz” üçün çox vacib idi. Amma növbəti tur tovuzlular Masazırda elə bir nəticəyə imza atdılar ki, qərb derbisindəki qələbə də kölgədə qaldı. Söhbət “Turan Tovuz”un “Sabah”ı səfərdə məğlub etməsindən gedir. Bu görüşdə qazanılan 3 xalın dəyəri daha artıq idi.

Şəxsən mən düşünürdüm ki, “Turan Tovuz” qazandığı bu özünəinamı “Zirə”ylə qarşılaşmada da davam etdirəcək, ən azı doğma meydanda uduzmayacaq. Amma Ayxan Abbasov və komandası uğurun davamını gətirməyi bacarmadı. Zirədən gələn qonaqlara cəmi iki dəqiqə bəs etdi ki, oyunun nəticəsini öz xeyrinə dəyişsin. Bununla da Rəşad Sadıqovun çalışdırdığı komanda son 4 oyunda həsrət qaldığı qələbənin dadını yenidən hiss etdi. İlk baxışdan elə görünə bilər ki, turnir cədvəli baxımıdan nə “Zirə”nin qazancı çox oldu, nə də “Turan Tovuz”un itkisi. Amma əslində elə deyil. “Turan Tovuz”un itkisi 3 xaldan, “Zirə”nin səfərdəki qəniməti isə sıradan qələbədən daha artıqdı. “Turan Tovuz” yüksəlişdə olduğu, azarkeşlərini və yeni sponsorunu ümidləndirdiyi bir vaxtda evində büdrədi. Bu məğlubiyyət həm də onu göstərdi ki, hazırkı heyət böyük demirəm, heç ortababab hədəflərə belə çatmaq üçün yetərli deyil. Tovuz təmsilçisi 24 oyundan sonra cəmi 26 xal toplayıb. Bu göstəriciylə nəinki ilk “üçlük”dən, hətta “Zirə”ylə “Qəbələ”dən də xeyli geri qalır. Bundan sonra yenidən belə qələbə seriyası yaxalamaq, özünəinam qazanmaq çox çətin olacaq. Çətin ki, belə sabit qrafiki, qələbə seriyasını yenidən yaxalamaq fürsəti olsun.

“Zirə” isə bu qələbə sayəsində mövsümün qalan hissəsinə yaxşı hazırlaşdığını, komandanın yaxşı potensialının olduğunu göstərdi. Ədalətli olsaq, etiraf etməliyik ki, qəsəbə təmsilçisi “Neftçi” və “Qarabağ”la oyunlarda məğlubiyyətə layiq deyildi. Heç “Qəbələ”ylə qarşılaşmadakı bərabərlik də ədalətli olmamışdı. Rəşad Sadıqovun məşqçi kimi qiymətləndirdiyim bir xüsusiyyəti var ki, bu da onun hədsiz səbirli olmasıdı. Düzdü, ehtiyat oyunçular skamyasında çılğın görünür, bəzən hisslərini cilovlaya bilmir. Amma oyundan sonra hər açıqlamasında səbrini nümayiş etdirir, yenilgiyə, xal itkisinə üsyankar yanaşmır, olanları qəbul edir. Güman edirəm ki, bu səbirli və soyuqqanlı davranışın da səbəbi klub rəhbərliyinin ona güvənməsi, yetərincə dəstək və zaman verməsidi. “Zirə”dən daha yaxşı oyun və nəticələr gözləməyə dəyər. Ümid edək ki, Tovuzdakı qələbə də “qara zolağ”ın sonu olacaq, yeni qələbələrin xəbərçisinə çevriləcək.

AMAL