Dəhşətli zəlzələ üzündən Türkiyə çempionatından çəkilmək məcburiyyətində qalan “Hatayspor” bir-birinin ardınca sarsıdıcı xəbərlər almaqdadı.

Bilindiyi kimi, xilasedicilər zəlzələnin 12-ci günündə hataylıların tanınmış qanalı yarımmüdafiəçisi Kristian Atsunun cəsədini dağıntılar altından çıxara bilmişdilər.

Atsu ilə eyni binada – arxası üstə çökmüş “Renessans Rezidens”də yaşayan “Hatayspor”un idman direktoru Tanər Savutdan isə xəbər yox idi. Hətta xilasedicilər də artıq ümidlərini itirmişdilər. Çünki bina tam ələk-vələk edilmişdi. Bazar ertəsi gecə saatlarında bu məsələ belə desək, ölü nöqtədən tərpəndi. Adanadan bir nəfər zəng vuraraq bu şəhərdə olan cəsədlərdən birinin Tanər Savuta çox bənzədiyini dedi. Bu üzdən günlərdi Hatayda olan və çökmüş binanın qarşısında xoş xəbər gözləyən Tanər Savutun qardaşı Əli Savut DNA testi vermək üçün elə həmin gecə Adanaya yollandı. Testin nəticəsindən sonra həmin cəsədin Savuta ait olduğu üzə çıxdı və klub idman direktorunun dünyasını dəyişdiyini rəsmən açıqladı.

Daha sonra baş məşqçi Volkan Dəmirəl də bununla bağlı paylaşım edərək Savutun həmişə sevgi və hörmət ilə xatırlanacağını yazdı. Onun cəsədi dünən məmləkəti İzmirə gətirilərək burda dəfn olundu.

Qeyd edək ki, 1974-cü il təvəllüdlü Tanət Savut sabiq futbolçu idi. Hətta 1997-99-cu illərdə “Fənərbaxça”da da çıxış etmişdi. Müdafiənin sağ cinahında oynayan Savutun İstanbul nəhəngindəki karyerası o qədər də parlaq keçməmişdi və iki mövsüm ərzində yalnız 30 rəsmi oyuna çıxa bilmişdi.

“Fənər”dən başqa “İzmirspor”, “Göztəpə”, “Siirtspor”, “Sakaryaspor”, “Alanyaspor” və “Tokatspor”da forma geymişdi. Məşqçilik üzrə B lisenziyasına malik olan Savut ötən ilin yayından bəri “Hatayspor”da idman direktoru kimi çalışırdı. Yeri gəlmişkən, Tanər Savut təxminən 21 il öncə sözün əsl mənasında ölümdən dönmüşdü. O vaxt “Sakaryaspor”luları “Sivasspor”la səfər oyununa aparan avtobus Yozqat şəhərində ağır bir qəza keçirərək dağlıq ərazidən keçərkən enişə yuvarlanmışdı. Həmin vaxt sakaryalıların 6 futbolçusu dünyasını dəyişmişdi. Ağıt yaralanan Savut isə həyatda qalmağı bacarmışdı. Yaxınları yenə möcüzə gözləsə də, bu dəfə alınmadı...

Bu arada 31 yaşlı Kristian Atsu ilə bağlı yeni faktlar ortaya çıxıb. Ötən sayımızda onun cəsədinin Türk Hava Yollarına məxsus təyyarə ilə vətəni Qananın paytaxtı Akkraya göndərildiyini xəbər vermişdik.

Akkradakı Kotoka hava limanında onun tabutu Qana bayrağına bükülərək əsgərlər və dövlət rəsmiləri tərəfində qarşılanıb. Burda ölkə prezidentinin köməkçisi Mahamudu Bavumia, bir sıra nazirlər və futbolçunun ailə üzvləri iştirak edib. Yardımları ilə tanınan Atsu ölkəsində çox sevilən insanlardan biri imiş. Çünki ehtiyacı olan insanlara həmişə yardım edir, Qanada yeni məktəblər tikdirir, yeniyetmə futbolçuları lazımi ləvazimatlarla təmin etdirdi. Yardım kampaniyalarına da dəfələrlə pullar köçürən Atsunun daha bir yaxşılığının üstü açılıb. Bunu Nigeriyada çox populyar olan və Craze Clown ləqəbi ilə tanınan bir gülüş ustası açıqlayıb. Tam adı Emmanuel Ogonna İvueke olan və əsl peşəsi həkim olan bu şəxs “tvitter”də maraqlı paylaşım edərək bunları yazıb:

“Kristian məni 2015-dən bu yana dəstəkləyirdi. Atamı itirdikdən sonra özü məni taparaq əlaqə qurdu və məzun olana qədər bütün xərclərimi ödəməyi boynuna götürdü. Sona qədər də sözünün üstündə durdu. Kristian, sən mənim çox böyük dostum oldun. Sənin üçün darıxacam. Göz yaşlarımı saxlaya bilmirəm. Hüzur içində yat”.

İvueke hətta 2016-cı ilə aid olan Atsu ilə “votsap”dakı danışığını da paylaşıb. Həmin dialoqda Atsu ondan nə qədər pula ehtiyacı olduğunu soruşur və təhsilini bitirdikdən sonra ona iş tapmaqda yardım edəcəyini bildirir. Gülüş ustasının bu paylaşımı böyük marağa səbəb olub və 20 mindən çox “layk” toplayıb.