Ötən ilin aprelində Şon Dayç sevimli “Bernli”sini tərk etdi – bu klubda keçirdiyi 9 il 5 ay və 16 gündən sonra. Və budu, mütəxəssis premyer-liqaya qayıdır.

Football-plus.az xəbər verir ki, Dayç “Everton”dan göndərilən Frenk Lempardın yerini tutub.

Yeni baş məşqçi ilə müqavilə 2025-in iyununa qədər nəzərdə tutulub. Dayçın qarşısına komandanı düşmə zonasından uzaqlaşdırmaq vəzifəsi qoyulub: hazırda 19-cu pillədə qərarlaşan liverpullular “xilaskar” 17-ci yerdən 2 xal geridədi. Arzuolunmaz seriyaları birnəfəsə söyləmək olar: bütün turnirlərdə son 14 oyunda 11 məğlubiyyət, premyer-liqadakı son 12 oyunda 9 məğlubiyyət, son 7 oyunda 6 məğlubiyyət və s. Premyer-liqada yalnız “Vulverhempton” (12) “Everton”dan (15) az qol vurub. “Göylər” noyabrdan bəri, demək olar ki, hər oyunda ən azı iki top buraxır, oktyabrdan bəri qələbəyə həsrətdi.

Byelsanı razı sala bilmədilər

Dayç baş məşqçi postuna yeganə namizəd deyildi. “The Athletic”in yazdığına görə, “Everton” rəhbərliyi Marselo Byelsanı dəvət etmək istəyib, ancaq argentinalı bəzi qeyri-adi şərtlər irəli sürüb. O, yaya qədər “Everton”un gənclərinə rəhbərik etmək istəyib. Həmin vaxt Byelsanın məşqçi korpusunun başqa nümayəndələri əsas komanda ilə işləyəcəkdi. “Lids”in sabiq çalışdırıcısı bu yolla növbəti mövsümə hazırlaşmaq üçün daha çox vaxt qazanmaq istəyib, yarım ildən sonra isə “Everton”un əsas komandasını qəbul edəcəkmiş. “Everton”u bütün səviyyələrdə öyrənən argentinalı akademiyadan tutmuş əsas komandaya qədər klubu yenidən qurmaq niyyətində olub. Bundan başqa, oyunçuların fiziki hazırlığının indiki səviyyəsindən narazılığını da gizlətməyib. Ancaq təhlükəli zonada əsən klubun rəhbərliyi daha sürətli və etibarlı qərar verməliydi. Bu üzdən Byelsa “Qudison Park”da olmayacaq. Əvəzində Dayç qayıdıb. Komandada ona tanış olan simalar var: Ceyms Tarkovski, Maykl Kin və Duayt Maknil “Bernli”də oynayıb.

Byelsa və Dayç ilə yanaşı, hazırda “Real”da atasına kömək edən Davide Ançelottinin personası da müzakirə olunub. Ancaq “Everton” rəhbərliyi belə hesab edib ki, baş məşqçi təcrübəsi olmayan 33 yaşlı mütəxəssisin təyinatı böyük riskdi.

Dayç əyalət komandasının əsas ulduzu idi

2021/22 mövsümündə “Bernli” hələ premyer-liqada mübarizə aparırdı. Məhz həmin vaxt Rusiyanın sports.ru saytında elitada təmsil olunan ən kiçik şəhər haqda yazı yer almışdı. Yazıda Dayçla bağlı fraqment də var. Yerli azarkeşlər bu məşqçiyə səcdə edirdilər, pabda onun adını pivəyə vermişdilər. Yazının həmin hissəsinə nəzər salaq: “2021-in sentyabrında – “Arsenal”la oyun ərəfəsində “The Royal Dyche” pabına baş çəkdim.

Həqiqətən də işıqlı və rahat bardı, ora oyun günü hətta uşaqlarla da getmək olar. Bütün divarlar və tavan müxtəlif illərin oyun formalarına bürünüb, barın məhəccərindən şərflər və bayraqlar asılıb. Arxa həyətin bağında divarlara klubun müxtəlif illərə aid loqotipləri və Dayçın portreti çəkilib. Barın özündə isə onun adını daşıyan pivə süzürlər. Pabın sahibi Castin Lorriman deyir:

“Amerikanın “Molson Coors” pivəbişirmə şirkəti düşərgələrindən birinə Dayçın adını verməyi təklif etdi. Mən də pabın adını dəyişəndə dərhal dedim ki, məşqçinin adına söykənən deyiləm, üzərində onun soyadı sayılan papaq və ya futbolka satmayacam. Burda satdığımız hər pivə bakalının pulunun yüzdəbiri “Burnley FC in the Community” xeyriyyə təşkilatına gedir. Bu qurum Bernli əhalisi üçün çox iş görüb. Şonla görüşdə bu haqda danışanda təşəbbüsümüzü xoş qarşıladı”.

Fanatlar da məşqçiyə çox isti yanaşırdı. Dayçın “Bernli” üçün necə vacib fiqur olduğunu karyerasının sonunda onun rəhbərliyi altında işləmək imkanı qazanan qapıçı Pol Robinson da deyir:

“İngiltərəli məşqçiləri tez-tez müəyən, primitiv oyun üslubuna görə suçlayırlar: uzun ötürmələr, düzxətli oyun... Müəyyən mənada belədi, ancaq Şon əlinin altında olan oyunçulardan ən yaxşısını qoparır. “Bernli”ni büdcəsinə görə premyer-liqanın başqa komandaları ilə müqayisə edin, sonda da bunların son illərdəki nəticələrini. “Bernli” kimi komanda üçün Avropa Liqasına vəsiqə qazanmaq qeyri-adi uğurdu” (premyer-liqanın 2017/18 mövsümündə 7-ci yeri tutan “Bernli” 51 illik fasilədən sonra avrokubokda oynadı – red.).

Ancaq ötən il “Bernli” Dayçla vidalaşdı. Qovulmanın əsas səbəbi uğursuz nəticələr idi – komanda premyer-liqada keçirdiyi 6 ildən sonra çempionşipə yuvarlandı.

Dayçın qovulmasıyla bağlı qeyri-populyar qərar klubun yeni sahibinə – amerikalı Alan Peysə məxsus idi. O, 2020-ci ildə “Bernli”nin səhmlərinin 84 faizini alan “ALK Capital” şirkətinə rəhbərlik edir. Artıq onda Peysin komandanı yeniləmək planı var idi – cansıxıcı üslubdan qurtulmaq və premyer-liqadakı ən yaşlı heyəti gəncləşdirmək istəyirdi. Kənardan bu istefa nəyisə dəyişmək yönündə impulsiv cəhd kimi görünə biərdi, ancaq yeni sahib çoxdan buna hazırlaşırdı. Baxmayaraq ki, mövsümün startı ərəfəsində baş məşqçi ilə müqavilə müddətini daha 4 illiyə uzatmışdı.

Son nəticədə komanda xilas ola bilmədi. Əvəzində indi çempionşipdə “at oynadır” – “Bernli” turnir cədvəlinin zirvəsindədi, həm də yeni baş məşqçi Vensan Kompaninin rəhbərliyi altında daha məzmunlu oyun göstərməklə.