Neymarın adı yenə qalmaqallı məsələdə çəkilir. PSJ-nin və Braziliya millisinin hücumçusu ölkəsində cinayət işinin təhqiqatı çərçivəsində izahat verəcək.

Braziliya polisi sələmçilik, “çirkli pulların yuyulması” və zərgərlik məmulatlarının qanunsuz daşınması ilə məşğul olan cinayətkar qruplaşmanın fəaliyyətini araşdırır.

Football-plus.az xəbər verir ki, hüquq-mühafizə orqanlarının məlumatında PSJ-nin hücumçusunun məhkəməyə şahid qismində çağrılacağı bildirilib.

Ulduz futbolçu cinayətkar qruplaşmanın rəhbəri sayılan Eduardo Rodriges Silva adlı şəxsdən brilyant qaşları olan, ağ qızıldan hazırlanan boyunbağı alıb. Zərgərlik əşyası idmançının adı şəklində hazırlanıb və onun dəyəri sənədlərə əsasən 106,4 min real (təxminən 19 min avro) təşkil edib.

Hazırda Silva qaçaq sayılır. Onun qruplaşmasının üç üzvü həbs edilib. Təhqiqata görə, Eduardonun adına qeydiyyatda olan zərgərlik şirkətinin bəyan etdiyi məbləğlər onun real gəlirindən uzaqdı. Belə ki, Neymara satılan zinət əşyalarının əməliyyat məbləği real gəlirin 81 faizini təşkil edir. Daha 11 hesab Silvanın özünün adına açılıb və orda satılan malların təsviri yoxdu.

Həmçinin məlum olub ki, şübhəlilərlə sövdələşmələr aparan digər şirkətlər saxta firmalar olub və yalnız “çirkli” zinət əşyalarının mənşəyini gizlətməyə xidmət ediblər. Onlar eyni vaxtda yaradılıb, bir neçə gün ərzində qüvvədə olub, hətta Silvanın şirkətinə faktura da verməyiblər.

Neymarla Silva sosial şəbəkələrdə bir-birini izləyirlər. Silva dəfələrlə futbolçu ilə fotolar paylaşıb. Bəzi şəkillərdə şübhəli şəxs futbolçuya digər zinət əşyalarını, o cümlədən brilyant zəncir və qızıl üzük verir. Müstəntiqlər Eduardonun 2019-cu ildə Neymarın doğum gününə gəldiyini göstərən fotoşəkillər də tapıblar.

Məlumunuz olsun ki, Silva artıq 2017-ci ildə 5 il 4 ay müddətinə həbs cəzasına məhkum edilib. O, hədə-qorxu ilə pul tələb etməkdə təqsirli bilinib. Silva və şəriki bir şəxsə 160 min real borc verib. Onlar əlavə olaraq 9 min real faiz qazanacaqdılar. Borc alan şəxs məbləğin yalnız bir hissəsini geri qaytara bilib və ilk ödənişdən sonra intihar edb. Eduardo və şəriki mərhumun qohumlarından 440 min realdan 900 min reala qədər pul tələb edib. Amma qazanc əldə etmək əvəzinə həbsə məhkum olunublar.

Yeri gəlmişkən, PSJ-nin azarkeşləri Liqa 1-in yanvarın 29-da keçirilən “Reyms”lə oyununda (1:1) Neymarın görkəminə görə çox narahatlıq keçiriblər. Komandanın qolunu vuran futbolçunun sağ gözü şişmiş və qızarmış vəziyyətdə olub. Pərəstişkarlarının bunun səbəbi ilə bağlı sualını qısa cavablayan braziliyalı sosial şəbəkədə belə yazıb: “Hətta qaldığım otaq da soyuqdu... Hə, gözüm artıq iki gündü şişmiş vəziyyətdədi...”
Əlavə edək ki, Neymarın Fransa çempionatının “Monpelye” ilə dünən keçirilən oyununu buraxacağı məlum olub.

Klubdan yayılan məlumatda ona əzələ yorğunluğuna görə istirahət verildiyi bildirilib.