Əlbəttə, kənardan hər şey sərlövhəyə çıxardığımız durumdan fərqli görünə bilər.

Football-plus.az xəbər verir ki, “Real” 24 yaşlı hücumçu ilə müqavilə bağlamaq perspektivindən həm ictimaiyyət önündə, həm də fərdi qaydada imtina edib – klub, ümumiyyətlə, bu mövzunun KİV-də görünməsini istəmir, yəni ötən yaydakı uğursuz cəhdlərdən sonra ehtiyatlı davranır. Bununla belə, madridlilər Kilian Mbappe və onun yaxın ətrafı ilə ünsiyyət üçün açıqdı və dünya çempionatından sonra bu yöndə müəyyən tərpəniş var. Məsələn, futbolçunun nümayəndələri “The Athletic”in sualının cavabında bildiriblər ki, bu mövzunu şərh etmək istəmirlər. Durum çox müəmmalıdı. Yaydakı transfer dastanından gəldiyimiz qənaət budu ki, bu işdə hər cür dönüş ola bilər. Və “Real” – Mbappe dastanı hələ də bitməyib.

Futbolçunun “Real”a keçidi ilə bağlı macəra yeni mərhələyə qədəm qoyur. Gələcəkdə nələrin baş verə biləcəyini təsəvvür etmək üçün 2022-nin yayınaqədərki Parisə dönmək lazımdı.

“Real”la “Liverpul” arasında Parisdə keçirilən ÇL finalından bir həftə əvvəl – mayın 21-də Mbeppe qərarını açıqladı. “Real”ın prezidenti Florentino Peresə mesaj göndərməklə keçidin mümkünsüz olduğunu, PSJ ilə müqavilə müddətini uzadacağını bildirdi. Təbii ki, bu qərarda siyasi təzyiqin də rolu oldu. Yeni müqavilə ilə bağlı danışıqlarda Qətərdən olan yüksək mənsəbli adamlar və Fransa prezidenti Emmanuel Makron da iştirak etdi. Pulun da rolu var idi, ancaq bu məsələdə fikir ayrılığı hökm sürür. Futbolçuya yaxın adamlar, elə Kilian özü də iddia edir ki, Madriddə daha çox qazanacaqdı. Onların dediyinə inansaq, “Real” reklam hüquqlarının 100 faizini təklif etməklə tarixi və analoqu olmayan addım atıb. “Real” isə öz növbəsində bildirir ki, PSJ-nin təklif etdiyi məbləğlə ayaqlaşa bilməz.

Parisdə bayram etdilər, futbolçu üzərində 2025 yazılan forma ilə kameralar önündə dayandı. Əslində müqavilə müddəti 2024-ə qədər uzadılıb, sonradan Mbappe razılıq verərsə, daha bir il artırıla bilər. Düzdü, DÇ-2018-in qalibi sövdələşmə baş tutmayandan sonra “Real” azarkeşlərinin könlünü almağa çalışdı. Ancaq fanatlar onun “instaqram” hesabında yazdığı “ÇL-in finalında “Real”ın əsas azakeşi olacam” paylaşımını qəzəblə qarşıladı. Pereslə futbolçunun anası və agenti olan Fayza Lamari arasındakı münasibətlər pozuldu. Prezident özünü xəyanətə uğramış adam kimi hiss etdi, çünki gələcək müqavilə ilə bağlı bütün detallar razılaşdırılmışdı. Ancaq danışıqlarda iştirak edən başqa adamlar da var idi və indiyə qədər “Real”la əlaqə saxlayırlar. Məqsəd aydındı: Mbappe PSJ-dən ayrılmağa qərar versə, “Real” danışıqlar masası arxasına keçəcək. Mbappe mayda Fransada qalmağa qərar verəndən sonra Madrid klubunun əsas planı budu. Və iyulda yaşananlar bu strategiyanı bir qədər də möhkəmləndirib.

Müqavilə müddətinin uzadılmasından heç ayyarım keçməmişdi ki, ulduz PSJ-nin irəlilədiyi istiqamət üzrə narazılığını klub rəhbərliyinə çatdırdı. Mbappe istəyirdi ki, Parisdə güclü, ÇL-i qazanmağa iddialı komanda formalaşsın. Bu iddianın cavabında rəhbərlik Kilianla “Monako”da çalışan Luis Kamposu idman direktoru postuna gətirdi. Bundan başqa Kampos baş məşqçi postuna Kristof Qaltyeni cəlb etdi. PSJ-nin transfer hədəfləri sonradan “Real”ı seçən Orelyen Çuameni, “Barselona”ya keçən Robert Levandovski və “İnter”də qalan mərkəz müdafiəçisi Milan Şkrinyar idi. Üstəlik Neymarla Mbappe arasındakı gərginlik də artdı və KİV-də çoxlu diskussiya doğurdu. Fransalı ulduz sol cinahda daha yaradıcı olduğu halda, mərkəz hücumçusu kimi oynamasından narazılığını gizlətmirdi. Hətta meydanda dəfələrlə topun ona çatmamasından narazılığını jestlərlə göstərmişdi.

Avqustda bu iki ulduz arasında penaltiləri kimin yerinə yetirməsi üzərində də mübahisə yarandı. Oktyabrın ortalarında Mbeppeyə yaxın mənbələr onun yanvardakı “transfer pəncərəsi” dövründə komandanı tərk etməklə bağlı qərar verdiyini bildirdi. Elə həmin qaynaqların iddiasına görə, yayda PSJ-nin bu transferə görə “Liverpul”dan 400 milyon avro istəməsi reallığı da var. Mbappe ilə PSJ arasında ən etibarlı bağ olan Kampos futbolçunun “öz qabında olmadığını” düşünür. Kilian PSJ-də çıxışını davam etdirmək yolunda çox çalışsa da, Kamposa özünü aldadılmış adam kimi saydığını da etiraf edib.
PSJ-də çalışan bəziləri deyirlər ki, Kilian “Qızıl buts” qazandığı, finalda het-triklə yadda qaldığı, kəsəsi, ulduz statusunu təsdiqlədiyi dünya çempionatından qayıdandan sonra futbolçunu motivasiyalı və nəticələrə görə həyəcan keçirən adam kimi görüblər. Görünür, indi onun mərkəzdə yox, daha çox sol cinahda oynaması da buna şərait yaradır.

İstənilən halda, Kilian yanvarda “Real”a keçməyəcək. Heç bu keçidin yayda baş tutacağı da inandırıcı deyil. Bununla belə, PSJ bilir ki, futbolçu “Real”da oynamaq arzusu ilə vidalaşmayıb. Zaman-zaman klubla futbolçu arasında gərginlik yaranır. Klubdakı qaynaq “The Atletic”ə belə deyib:

“Real” hələ ki istənilən mümkün transferə təmkinli yanaşır. Təbii ki, səbəblərdən biri ötən yayın təcrübəsi ilə bağlıdı. Amma bu da əsas deyil. Madrid klubu belə hesab edir ki, Mbappenin indiki müqaviləsi və PSJ-də qərarların qəbuluna göstərdiyi təsir onu praktiki cəhətdən istənilən başqa komanda üçün əlçatmaz edir. Ancaq vəziyyət dəyişsə, Mbappe normal həyata dönsə, “Real”ın pulu da var, planı da. Klub xərclərin azaldılması yönündə iş aparır və son vaxtlar maliyyə ilini, adətən, gəlirlə başa vurur. Peresin idarəçiləri koronavirus pandemiyasında sonra maaşları azaldıb, üstəlik ÇL-dəki uğurlara görə büdcəyə pul axmaqdadı, tranfer bazarında da yersiz addımlardan söhbət gedə bilməz. “Transfermarkt”a əsaslansaq, “Real” 2022-nin yayında oyunçu alış-satışından 12,15 milyon dollar qazanıb.