Qətərlilər almanları ələ saldı
Srağagün DÇ-2022-nin E qrupunda oynanılan Yaponiya – İspaniya matçında vurulan qol böyük müzakirələrə səbəb oldu.
Football-plus.az xəbər verir ki, Yaponiyanın 2:1 hesabıyla qalib gəldiyi görüşdə yaponların qələbə qolundan öncə topun xətti keçib-keçməməsi sosial şəbəkələrdə çox müzakirə olundu. Daha öncə Portuqaliyanın Uruqvaya vurduğu qolun Kriştiano Ronaldonun adına yazılmamasının səbəbinə aydınlıq gətirən FİFA bu məsələyə də qarışmağı lazim bilib. Qurumun saytında yerləşdirilən rəsmi açıqlamada qolun qaydalar çərçivəsində vurulduğu qeyd olunub:
“Yaponiyanın İspaniyanı 2:1 yendiyi qarşılaşmada vurduğu 2-ci qol zamanı topun meydanı tərk edib-etmədiyini müəyyənləşdirmək üçün VAR-ın köməyindən istifadə edildi. VAR hakimləri həmin epizodda topun xətti tam keçib-keçmədiyini aydınlaşdırmaq üçün qapının üzərində quraşdırılan xətt kamerasının köməyindən istifadə etdilər. Digər kameralarla çəkilən görüntülər aldadıcı ola bilər. Amma əlimizdə olan sübutlara əsasən top meydanı tam tərk etməmişdi”.
Bilindiyi kimi, məhz bu qol qrupda aləmi bir birinə vurdu. Yaponiya qrupu zirvədə, İspaniya isə 2-ci pillədə tamamladısa, Almaniya Kosta Rikanı məğlub etməsinə rəğmən, 3-cü pillədən yuxarı qalxa bilmədi və turnirlə vidalaşmalı oldu. Bu arada Qətərdə yerli kanallardan biri almanları ələ salıb. DÇ-yə həsr olunan verilişlərdən birinin sonunda aparıcı və qonaqlar ağızlarını bağlayaraq əl sallamağa başlayıblar. Aparıcı bu hərəkətə belə aydınlıq gətirib:
“Biz hazırda Almaniya yığması ilə vidalaşırıq”.
Təbii ki, bu, alman futbolçuların jestinə qarşı edilən bir cavabdı. Bundestim qrupun ilk turunda Yaponiya ilə matça çıxarkən futbolçular komanda formasında şəkil çəkdirərkən əlləri ilə ağızlarını bağlayaraq FİFA-ya etiaz etmişdilər. Bu etiraz FİFA-nın göy qurşağının rənglərini əks etdirən və üzərində “OneLove” yazılmış kapitan sarğısının taxılmasına qadağa qoyması ilə bağlı idi.
Digər xəbərlər
