“Almaniyanın bizə vurduğu 3-cü qol ayda bir dəfə yuxuma girir” - Səbri Sarıoğlu
“Qalatasaray”ın öz yetirməsi olan və “altyapı” ilə birlikdə 18 il bu klubda çıxış edən, eləcə də Türkiyə yığmasında 44 oyun keçirən Səbri Sarıoğlu “A Spor” kanalına açıqlamalar verib.
"Football-plus.az" xəbər verir ki, “Cim-Bom”dan ayrılandan sonra bir mövsüm “Göztəpə”nin şərəfini qoruyan və 2018-ci ildə karyerasını bitirən 38 yaşlı Səbri DÇ-dəki favoritləri, “Fənərbaxça”nın baş məşqçisi Jorje Jezuş və Türkiyə üçün unudulmaz turnirlərdən olan AÇ-2008 haqda danışıb: “DÇ-2022-də favoritlərim Fransa, İspaniya və Braziliyadı. Bu üç komandadan birinin çempion olacağını düşünürəm. “Qalatasaray”lı Saşa Boeni çox bəyənirəm. Məncə, hazırda çempionatımızın ən yaxşı sağ cinah müdafiəçisidi. Həm müdafiə, həm də hücum planında əla təsir bağışlayır. Amma üzərində bir qədər də işləməlidi. Cinah müdafiəçiləri hücuma çox dəstək verməlidi. Onunla bağlı ən diqqətçəkən məqam odu ki, mövsümün əvvəlində əsas komandadan kənarlaşdırılsa da, həvəsdən düşmədi və üzərində çalışmaqda davam edir. Adətən, belə vəziyyətdə əcnəbi oyunçular bütün pullarını tələb edir, FİFA-ya şikayət ünvanlayır və klubdan ayrılırlar. Amma Boe burda qalıb savaşmağa, oynamağa layiq olduğunu sübüt etməyə üstünlük verdi. Məncə, doğru addım atdı və indi də fanatların sevimli oyunçularından biridi. Jorje Jezuş rəngarəng xarakterə malik təcrübəli mütəxəssidi. Rotasiyadan çox gözəl istifadə edir. Adətən, oynamayan futbolçular xoşbəxt olmurlar. Ehtiyat skamyada, belə desək özlərini naza qoyurlar. Amma Jezuşun komandalarında belə deyil. Əksinə, oyunçular bilirlər ki, üzgün görünsələr və məşqçiyə “sifət çıxarsalar”, Jezuş onlara şans verməyəcək. Ona görə də özlərini həmişə hazır vəziyyətdə tuturlar. Almaniyanın AÇ-2008-in yarımfinalında son dəqiqələrdə bizə vurduğu 3-cü qol ən azı ayda bir dəfə yuxuma girir. O matç ərəfəsində zədəlilərimiz və problemlərimiz çox idi. Səhv etmirəmsə, ehtiyatda cəmi 1 və ya 2 oyunçumuz qalmışdı. Performans baxımından ən yaxşı oyunumuzu sərgilədiyimiz bir matçda turnirlə vidalaşmalı olduq. Oyunu xatırlayanlar bəlkə də bilir. İlk hissədə biz çox təhlükəli əks-hücuma çıxarkən almaniyalı bir oyunçu yerə yıxıldığından Həmit Altıntop hücumu saxladı və topu meydandan çıxardı. Biz də son dəqiqələrdə almanlardan eyni hərəkəti gözlədik. Çünki Kolin Kazım yerdə idi. Amma topu çıxarmadılar. Biz də 2-3 saniyəlik yaşadığımız çaşqınlıq üzündən qol buraxdıq. Həmin qolda Filip Lam komanda yoldaşı ilə “divar ötürməsi” oynayaraq mənim önümdən keçdi. İnanın ki, o epizod dəfələrlə yuxuma girib. Bizim vurduğumuz 2-ci qolda mən məhz Lamı geridə qoyub Semih Şəntürkə məhsuldar ötürmə vermişdim. Bu dəfə isə o məndən intiqam aldı” (gülür).
