Kuaresma Jezuşa hansi məsləhəti verdi?
''Beşiktaş''ın sabiq ulduzu Rikardo Kuaresma Portuqaliya mətbuatına açıqlamalar verib.
İki fərqli dönəmdə (2010-12, 2015-19) ''Qartal''ın şərəfini qorumuş 38 yaşlı futbolçu son iki mövsümü ''Gimrayanş''da keçirmişdi. Hazırda azad agent statusunda olan Kuaresma karyerası ərzində ''Barselona'', ''İnter'', ''Çelsi'' kimi böyük klublarda oynamasına rəğmən, ''Beşiktaş''la ''Portu''nu ön plana çıxarıb və ''Fənərbaxça''nın başına keçən həmyerlisi Jorje Jezuşa məsləhətlər verib:
''Özümü fiziki cəhətdən yaxşı hiss edirəm. Sağlamlığım imkan verdiyi müddətdə oynamaq istəyirəm. Karyeramı bitirməmişəm. Bir klubla anlaşacağıma ümid edirəm. Bir çox böyük klubda top qovsam da, mənim üçün ''Beşiktaş''la ''Portu''nun yeri ayrıdı. Bu klublarda oynayanda tək həftəsonu yox, həftənin bütün günləri üzərində təzyiq hiss edirsən. Çünki hətta restorana gedəndə də səndən daha çox qaçmağı, daha çox mübarizə aparmağı tələb edən adamlarla qarşılaşırsan. ''Beşiktaş'' da, ''Portu'' da tam fərqli dünyadı. Belə klublarda oynamaq üçün xarakter, şəxsiyyət, qürur, iradə və qərarlılıq lazımdı! Ümumiyyətlə, Türkiyə futbolu tamə fərqli mentallığa malikdi. Oranın futbolu ayrı dünyadı. Jorje Jezuş həm klubda, həm də Türkiyə futbolunda fərqli şeylərlə qarşılaşacaq. Bunların öhdəsindən gəlmək üçün yetərincə səbirli olub-olmayacağını bilmirəm. Səbri çatsa, uğur qazana biləcək. Amma bu heç də asan olmayacaq. Serxio Oliveyranın “Qalatasaray”da ümidləri doğruldacağını düşünürəm. Cünki səviyyəli oyunçudu və güclü xarakterə malikdi. Bunu oynadığı hər klubda sübut edib”.
''Beşiktaş''dan söz düşmüşkən, bir xəbəri də diqqətinizə çatdıraq. Təcrübəli dayaq yarımmüdafiəçisi Jozef de Souzadan üzücü xəbər gəlib. 33 yaşlı futbolçu komanda ilə birlikdə Avstriyada olsa da, onun diz ağrıları davam edir. Tibbi müayinədən sonra məlum olub ki, braziliyalı oyunçunun dizində maye yığılıb. Klubun həkimləri bu problemi tez müddətdə aradan qaldırmağın mümkün olduğunu düşünmürlər. Bu üzdən Souzaya əməliyyat olunmaq təklif edilib. Türkiyə mətbuatının yazdığına inansaq, ''sambaçı'' əməliyyat olunacağı təqdirdə təxminən 3-5 ay yaşıl meydanlardan kənar qalacaq. Xatırladaq ki, ''Beşiktaş''ın yeni transferlərindən olan Romeyn Saiss də zədədən əziyyət çəkir və hələ də komanda ilə birlikdə məşq edə bilmir. Onun yeni mövsümün startına qədər hazır olub-olmayacağı bəlli deyil.
ƏLİ
Digər xəbərlər
