Puyol: “Sənə tam ədalətsiz münasibət göstərdilər”
Cümə axşamının bütün futbol olayları öz yerində, ancaq Jerar Pikenin mövsümün ortasında karyerasını bitirməklə bağlı qərar verməsi aydın səmada şimşək çaxmasına bənzər effekt doğurdu.
Bu qərarı şərtləndirən səbəblər, 35 yaşlı müdafiəçinin son vaxtlar yaşadıqları, onun gedişini müşayiət edən reaksiyalar ilə aşağıda tanış olacaqsız. Amma əvvəlcə futbolçunun “Barsa” azarkeşlərinə ünvanladığı təsirli videoçarxda səslənən fikirləri eşidək:
“Kules, bu Jerardı. Son bir neçə həftə, ay ərzində çoxları haqqımda danışdı. Bu ana qədər susdum. Ancaq indi sizə özüm haqqında danışan adam olmaq istəyirəm. Çoxlarınız kimi, mən də həmişə “Barselona” azarkeşi olmuşam. Son vaxtlar bu uşaq haqda çox düşündüm. Ona bütün arzularının çin olacağını – “Barselona”nın əsas komandasına düşəcəyini, bütün mümkün titulları qazanacağını, Avropa və dünya çempionu olacağını, tarixin ən yaxşı futbolçuları ilə birgə oynayacağını, kapitanlardan biri olacağını, ömürlük dostlar qazanacağını desəydilər, balaca Jerar nə düşünərdi?! “Barselona”nın oyunçusu olduğum gündən 25 il keçib. Getdim və qayıtdım. Futbol mənə hər şey verdi. “Barsa” mənə hər şey verdi. Siz, kules, mənə hər şey verdiz. Və indi – bütün uşaqlıq arzularım çin olandan sonra sizə demək istəyirəm ki, bu yolda nöqtə qoymağın əsl vaxtıdı. Həmişə deyirdim ki, “Barselona”dan başqa komandada oynamayacam. Belə də olacaq. Şənbə oyunu mənim üçün “Nou Kamp”da sonuncu olacaq. Adi azarkeş olacam, komandanı dəstəkləyəcəm. Kluba sevgimi uşaqlarıma ötürəcəm. Ailəm mənə ötürdüyü kimi. Və siz məni tanıyırsız, gec-tez qayıdacam. “Nou Kamp”da görüşərik. Yaşasın “Barsa”! Əbədi”.
Cari mövsümdə cəmi 5 oyuna çıxan Pike “Barselona”nın akademiyasının yetirməsidi. 1997-2004 aralığında bu komandada olandan sonra “Mançester Yunayted”ə yollandı və 2008-də birdəfəlik Kataloniyaya qayıtdı. Ümumilikdə 35 titul qazanıb, bunların sırasında 9 çempionluq, 4 Çempionlar Liqasının kuboku, dünya və Avropa çempionluğu da var. Pike böyüklər arasında 800-ə yaxın oyun keçirib. 102 oyun keçirdiyi İspaniya yığmasında karyerasını 2018-də bitirib. Amma o da maraqlıdı ki, Luis Enrike Qətər mundialına aparmağı planlaşdırdığı heyətə 35 yaşlı müdafiəçinin də adını salmışdı. “Barsa”da oyun sayına (615) görə klub tarixinin beşincisidi. Bu oyunlarda 53 qol vurub, 15 məhsuldar ötürmə verib, 154 sarı, 10 qırmızı vərəqə ilə cəzalanıb.
Niyə getdi?
Bəribaşdan deyək ki, nə klub prezidenti Xuan Laportanın, nə də rəhbərlikdə təmsil olunan başqalarının məzmununu yuxarıda çatdırdığımız videoçarxdan xəbəri olub. Yəqin şənbə günü – “Almeriya” ilə oyunda Xavi Pikeyə sonunc dəfə şans verəcək və bununla da “Barsa”nın daha bir əfsanəsi klubdan ayrılacaq. İspaniyalı həmkarlarımızın fikrincə, müdafiəçinin qəfil qərarı futbolla bağlı problemlər, eləcə də medianın son həftələrdəki təzyiqi ilə bağlıdı. Futbolçu belə hesab edir ki, həmin tənqidləri haqq etmir. Üstəlik klub prezidenti Laportadan da incikdi, amma bu incikliyi ictimailəşdirmək istəmir.
Ümumiyyətlə, Pike – “Barsa” münasibətləri çoxdan qaydasında deyildi. Klub hələ ötən yay nəhəng maaşı üzündən onunla vidalaşmaq istəyirdi. “Barsa” ilə əvvəlki müqavilənin şərtinə əsasən, o, Avropanın ən yüksək ödənişli müdafiəçisi sayılırdı – ilə 28,4 milyon avro (təmiz 15 milyon). Pike Serxio Ramosu arxada qoymaq üçün klubun sabiq prezidenti Xosep Bartomeu ilə danışıqlarda bu statusu “ələ keçirmişdi”. Xavi ilə münaqişə şəraitində olan müdafiəçi əsas heyətdə yerini itirmişdi. Daim eşitdiyi maaşın azaldılması ilə bağlı xahişlər və əsas heyətdə yerini itirmək Pikenin xoşuna gəlmirdi. Xavi isə müdafiəçinin giley-güzarından bezmişdi. Sentyabrda hətta “Atletiko”nun ona maraq göstərməsi haqda yazanlar var idi.
Üstəlik şəxsi həyatla bağlı problemləri də unutmayaq. Pikenin məşhur müğənni Şakira ilə yaydakı ayrılığı heç də asan olmadı. Hətta “Barsa”nın prezidenti Laporta həmin günlərdə belə demişdi:
“Pike əzab çəkir. O, azarkeşlərin dəstəyini və sevgisini haqq edir. Onu hisslərdən məhrum, yüngülağıl adam kimi göstərməyə çalışan xəbərlərə qulaq asmayın”.
Beləliklə, Pike gedir və klubun ona verməli olduğu 52 milyon avrodan da imtina edir... Kataloniyalılar ÇL-də mübarizəni dayandırdığına görə üzləşdiyi maliyyə itkisini (40 milyon avro həcmində dəyərləndirilir) bir növ kompensasiya edəcək.
Bəs azarkeşlər nə deyir?
“Barsa” azarkeşlərinin Pikenin son qərarına münasibəti birmənalı deyil. Sevinən və hətta Şakiranın mahnısından sitat gərirən də var, kədərlənən və ona təşəkkür edən də.
* Onun gedəcəyini gözləyirdim, ancaq mövsümün sonunda. Hər şey belə tez baş verdi.
* Təbrik edirəm, sən əla oynayırsan! (Şakiranın mahnısından götürülən sitatdı – red.)
* Bu qərar 4 il gecikdi, ancaq belə də gedər.
* Jerar, sənin üçün çox darıxacağıq, klubumuzun tarixindəki ən yaxşı müdafiəçilərdən biri idin. Bu mərhələ bitdi, ancaq hələ görüşəcəyik. Hörmətlər.
* Adam eyni vaxtda həm əfsanə, həm də cani ola bilərmi? Bəli, ola bilər. Onun adı Jerar Pikedi. Sağ ol, Jerar, görüşənə qədər!
* Oh, Jerarın bu qərarına çox hörmət edirəm. Bil ki, klub üçün etdiklərini yüksək dəyərləndiririk, sən klubun əfsanəsisən. Hər şeyə görə sağ ol, kapitan.
* Rəqiblər sənin üçün darıxacaq.
* Son illər uğursuz alındı, ancaq formanın zirvəsində olarkən klub üçün etdiklərin hörmətə layiqdi. Sağ ol, kapitan.
* Getdi, ona görə ki, meydana Şakiranın formasında çıxmaq istəmədi. Ha-ha-ha!
* Bu videoçarx məni həyəcanlandırdı. Gözləmirdim. Hər şeyə görə sağ ol, Jerar.
Reaksiyalar
Xavi Ernandes, “Barselona”nın baş məşqçisi:
“Pikeyə münasibətlə ədalətli olub-olmadığımı bilmirəm. Ancaq səmimi və dürüst oldum. Jerar həmişə komanda üçün nümunə idi, məşqlərdə 100 faiz gücünü qoyurdu. Mövsümün startından əvvəl onunla söhbətim oldu. Niyyətimi ona çatdırdım. Məşqçi karyeramda ən çətin anlardan biri idi. Həmin söhbəti nəzərdə tuturam. Elə son söhbəti də. O, oyundaşım olub. Mən də bu yolu keçmişəm və çətinliklə öhdəsindən gəlmişəm”.
Xuan Laporta, “Barselona”nın prezidenti:
“Pike uğurları və barselonizm fəlsəfəsi sayəsində klub embleminin bir hissəsidi. O, həmişə nümunə olacaq. Getməklə bağlı razılaşma prosesi gedir, ancaq Jerarın kluba yardım etməklə bağlı böyük arzusu var. O, “feyr-pley” və maaş fondu planında vəziyyəti anlayır. Bir müddət karyerasını bitirmək variantını müzakirə etdik, son günlərdə isə bu istəyi güclənib. Son qərarı vermək imkanını ona buraxdıq. Pikenin qərarına hörmət edir və onu bölüşürük”.
Karles Puyol, “Barselona”nın müdafiəçisi:
“Jeri, hər şeyə görə sağ ol. Mən şokdayam. Sənə tam ədalətsiz münasibət göstərdilər. “Barsa”nın futbolkası uğrunda sənin kimi döyüşən az adam olub. Həmişə deməyə hazıram ki, sənlə birgə oynamaq imtiyaz idi. Səni sevirəm, dostum”.
Fernando Yerro, “Real”ın sabiq müdafiəçisi:
“Bu böyük itkidi. Həmişə demişəm ki, o və Serxio Ramos mənim üçün dünyanın ən yaxşı iki mərkəz müdafiəçisidi. Pike niyə belə qərar verdiyini bilir. Ona sevgimi və dəstəyimi çatdırmaq istəyirəm”.
Xavyer Tebas, La Liqanın prezidenti:
“Pike niyə də “Barselona”nın prezidenti olmasın?! Neçə ildi meydandan kənarda iş qurub. Biznes aləmində qərarlaq qəbul etməklə formalaşır. Jerar prezident olmağa qadirdi. Özü və sosyos istəsə”.
Digər xəbərlər
