Messi “Barsa”ya dönməyin əleyhinə deyil
Lionel Messinin “Barselona”ya mümkün dönüşü ilə bağlı şayiələr yenidən İspaniya mediasında vüsət almaqdadı.
Həmkarlarımız bildirir ki, “Barsa” argentinalının “Nou Kamp”a dönməyi arzuladığına əmindi – Messi PSJ ilə gələn yay müddəti bitəcək müqaviləni yeniləməyə hazırlaşmır. Düzdü, Leonu çəkindirən amil də var. O, özünü Jerar Pike ilə eyni komandada görmür.
Jurnalist Luis Kanut yanvarın sonunda iddia edirdi ki, Leo vaxtilə onun komandada qalması üçün maaşının azaldılmasına razılıq verməyən Pikenin hərəkətinə görə məyusdu:
“Pikenin müqavilə müddətini uzatması Messini çox incitdi. O xəyanətə uğradığını düşünür. Pike Messi “Barsa”dan gedənə qədər müqavilə müddətini uzatmadı. Messinin fikrincə, Pike müqavilə müddətini daha əvvəl uzadıb onun gedişinə mane ola bilərdi”.
Pike “Barsa” və Xavi ilə münaqişə yaşayır
Ümumiyyətlə, Pikenin “Barselona” ilə münasibətlərində çoxdan gərginlik hökm sürür. Klub hələ ötən yay nəhəng maaşına görə onunla vidalaşmaq istəyirdi. Əvvəlki müqavilənin şərtinə görə Jerar Avropanın ən yüksək ödənişli müdafiəçisi idi – ildə 28,4 milyon avro (təmiz 15 milyon). O, klubun sabiq prezidenti Xosep Bartomeu ilə danışıqlarda bu statusa nail olmuşdu ki, Serxio Ramosu arxada qoysun (Ramos 12,5 milyon təmiz qazanır). 2020-də Pike müqaviləni yenilədi. “El Mundo” iddia edir ki, anlaşmanın şərtinə görə müdafiəçinin mövsümlər üzrə maaşı belə tənzimlənəcək: 2020/21 mövsümü – vergilər ödənməmiş 18 milyon avro, 2021/22 mövsümü – vergilər ödənməmiş 27,7 milyon avro, 2022/23 mövsümü – vergilər ödənməmiş – 29,5 milyon avro, 2023/24 mövsümü – vergilər ödənməmiş 40,8 milyon avro.
Kataloniya mediasına inansaq, Pike iki dəfə maaşının azaldılmasına razılaşıb – birinci dəfə hələ Bartomeunun vaxtında, yəni 2020-də (50 faiz), ikinci dəfə isə Xuan Laportanın gəlişindən sonra. Ancaq çox güman, söhbət ödənişlərin ləngidilməsindən gedir. Klub yaxın vaxtlarda borclarını qaytarmalı olacaq, yaşlı müdafiəçinin maaşının ilbəil artması məhz gecikməyə razılıq verməsi ilə bağlıdı.
35 yaşlı müdafiəçi artıq start heyətində yerini itirib və baş məşqçi Xavi ilə münaqişədədi. Maaşın azaldılması ilə bağlı daimi xahişlər və start heyətində yerini itirməsi Pikenin xoşuna gəlmir. Xavini isə futbolçunun daim gileylənməsi və klubdan nələrsə tələb etməsi özündən çıxarır. “Atletiko” ona maraq göstərir – Dieqo Simeone müdafiəni gücləndirmək niyyətindədi, “hindular” Pikeni müdafiənin lideri kimi görür. Hərçənd ortada konkret anlaşma yoxdu.
Pike Messinin gedişinə görə ağladığını deyirdi
Leo “Barsa”nı tərk edəndə Pike kədərləndiyini deyirdi:
“Messi gedəndə ağladım. Ona görə ağladım. “Barselona”da keçirdiyi dönəmi nəzərə alsaq, karyerasının sonuna qədər klubda qalması əla olardı. Müqavilə müddətini uzatmamasını anlaya bilərəm. Əvvəlki prezident və onun menecmenti üzündən klub maliyyə problemi yaşayırdı. Messi “Barselona” və azarleşləri üçün Allaha bərabər idi”.
Ancaq ümumilikdə Pike ilə Messinin münasibətləri bundan xeyli əvvəl pozulmuşdu. Daha dəqiqi, Leonun xanımı Antonello Rokutso ilə münasibətlər korlanmışdı. İş ondadı ki, Antonella Pikenin əvvəlki qız dostu Nuriya Tomas ilə xoş münasibət saxlayırdı. Jerar isə onunla çox pis vidalaşdı, yəni ayrılmadan Şakirə ilə görüşməyə başladı. Məhz bu münasibətlər üzündən Pike Messinin də toyunda iştirak etmədi.
Digər xəbərlər
