Yeni fəaliyyətə başlayan “Xəzər Lənkəran 42” Region Liqası üçün hazırlığı davam etdirir.

Cənub təmsilçisi turnirin yekununda çempion olmaq arzusundadı. Ən azı klubun idman direktoru Höccət Hacıyev qəzetimizə açıqlamasında bunu iddia etmişdi. Futbol camiəsində gəzən söz-söhbətdən də anlamaq olar ki, Lənkəran futbolunu ən azı qarşıdakı mövsümdə maraqlı hadisələr gözləyir.

Görəsən, komanda hansı gücdədi? İddia olunan kimi çempionluğa oynamaq potensialı varmı? Futbolçular hansı maaşla “Xəzər Lənkəran 42”də çıxış edir? Suallarımız çoxdu. Onlara cavab tapmaq üçün Ağadadaş Həmidovla əlaqə saxladıq. Komandada məşqçi funksiyasını yerinə yetirən təcrübəli mütəxəssisin cavabı belə oldu: “Gəlin, bir məsələni dəqiqləşdirim. Mən rəsmən komandanın baş məşqçisi deyiləm. Hələlik bu vəzifəni icra edirəm. Region Liqasındakı oyunlara da komandanı mən çıxaracam. Gündəlik məşqlərimizi edirik. Əvvəlcə seleksiya toplanışı oldu. 40-a yaxın futbolçu arasından üç-dördünü seçdik. Daha sonra Lənkəran futbolunun yetirmələrinə müraciət etdik. Cənub bölgəsindən də uşaqlarımız var. Yaxşı kollektiv formalaşdırmışıq. Onlarla taktiki-texniki və fiziki məşqlər keçirik. Mən həmişə iddiası olan insanam. Düşünürəm ki, çempionluq uğrunda mübarizə apara bilərik. Həqiqətən də komandada çox yaxşı uşaqlar var. Deyirlər ki, “Xəzər Lənkəran”ın son illərində çıxış edən oyunçulardı. Bu, doğru deyil. Mənim dövrümdə akademiyada çıxış edən 1997, 98, 99 təvəllüdlü gəncləri bura yığmışıq. “Xəzər Lənkəran”ın premyer-liqada çıxış etdiyi son mövsümdəki heyətindən heç kim yoxdu. Buna baxmayaraq, özümüzə, gücümüzə və azarkeşlərimizə inanırıq”.

Ağadadaş bəy “Xəzər Lənkəran 42”nin rəqiblərini Lənkəran şəhər stadionda qəbul edəcəyini söyləməklə yanaşı, oyunçulara veriləcək məvacibdən də söz açdı: “Təbii ki, öz stadionumuzda oynayacağıq. Lənkəran şəhər stadionunda bir sıra dəyişikliklər edilib. Ümid edirəm ki, azarkeşlərə xoş anlar yaşadacağıq. Futbolçuların əksəriyyəti ilə maaş söhbəti olmayıb. Hazırda, sadəcə, komanda formalaşdırırıq. Təbii ki, hamı futbolu pula görə oynayır. İndi maliyyə haqda danışmaq tezdi. Yaxşı heyət formalaşdırandan, qələbələr qazanandan sonra oyunçuların maaşı bəlli olacaq. Hələlik isə onların hamısı Lənkəran futbolunun xətrinə komandada çıxış edir”.

Ağadadaş bəy cənub bölgəsinin futbol ictimaiyyətinin inamını hiss etdiklərini də dilə gətirdi: “Mənimlə bağlı xəbərlər yayılandan çoxlu zəng gəlir. Hamı təbrik edir, sevinənlər var. Həm mənə, həm də Lənkəran futboluna görə. Düşünürəm ki, lənkəranlıların futbol sevgisinə layiq iş görəcəyik. Bəli, “Xəzər Lənkəran” möhtəşəm işlər gördü. Çempionata maraq və rəqabət qatırdı. Çalışırıq ki, keçmiş günləri qaytaraq. Mən buna inanıram. Bu düşüncəm olmasaydı, hazırda komandada yer almazdım. İnsanların da inamını görmək bizə əlavə güc verir”.

İLKİN SULTANLI