Lənkəranda futbol adına yeni həyəcan başlayır.

“Xəzər Lənkəran 42” Region Liqasında çıxış edəcək. Komanda artıq formalaşıb və turnirin favoritlərindən sayılır. Ötən sayımızda diqqətinizə çatdırmışdıq ki, “ağ-yaşıllar”ın rəhbəri Höccət Hacıyev olacaq. Klub haqda ətraflı məlumat almaq üçün adı çəkilən şəxslə əlaqə saxladıq. Höccət bəylə “Xəzər Lənkəran 42”nin strukturu, hədəfləri və problemləri barədə söhbətləşdik.

- Höccət bəy, xeyirli olsun, yeni komanda yaratmısız...
- Təşəkkür edirəm. İnşallah, Azərbaycan futbolu üçün xeyirli olar.

- Bu təşəbbüsün müəllifi kimdi? Necə oldu ki, “Xəzər Lənkəran 42”ni yaratmaq fikrinə düşdüz?
- Azərbaycan futbolu illərdi “Xəzər Lənkəran”sız qalmışdı. Cənubun futbol ictimaiyyəti belə klubun yolunu gözləyirdi. Biz də düşündük ki, “Xəzər Lənkəran 42”ni yaradaq. Çalışacaq ki, qələbələrimizlə azarkeşlərimizi sevindirək.

- Klub prezidenti siz olacaqsız. Başqa kimləri “Xəzər Lənkəran 42”də görəcəyik?
- Mən klub prezidenti yox, idman direktoruyam. Lənkəranın futbol ictimaiyyətindən tanınmış şəxsləri də burda görəcəksiz. Bir müddət sonra bəzi məsələlər haqda ictimaiyyətə məlumat verəcəyik.
-
Siz prezident deyilsizsə, onda Mais Mənsimovdu klubun rəhbəri?
- Yox. Ümumiyyətlə, klubun prezidenti də mənəm, idman direktoru da. Hələ ki struktur formalaşmayıb. İşlər qaydasında gedəndən sonra rəhbərlik bəlli olacaq. Hələ ki buna ehtiyacımız yoxdu.

- “Xəzər Lənkəran 42”i “Xəzər Lənkəran”ın davamıdı?
- Yox. Sıfırdan qurulan yeni klubdu.

- Klubun loqosu, rəngləri və sair eynidi axı?
- Ağ və yaşılı Lənkəranda hamı sevir. “Xəzər Lənkəran” hamımızın sevimlisi olub. İstəyirik ki, həmin klubun ənənələrini yaşadaq.

- Komandanın baş məşqçisi kim olacaq?
- Ağadadaş Həmidov. Düşünürük ki, doğru seçim etmişik. Lənkəran futboluna bələd olan insanla çalışmaq istədik.

- Ağadadaş müəllim qəzetimizə açıqlamasında bildirib ki, mən baş məşqçi deyiləm. Yeni komanda formalaşır, onlara kömək edəcəm.
- Düz deyir. Amma hələ ki komandanı o formalaşdırır. Ola bilsin, yeni baş məşqçi ilə razılaşdıq. Başqa birini də təyin edə bilərik. Amma hazırda Ağadadaş Həmidovdu məşqçimiz.

- Hansı futbolçuları komandaya dəvət etmisiz?
- “Xəzər Lənkəran”ın son illərində çıxış edən oyunçulara dəvət göndərmişik. Ümid edirəm ki, güclü kollektiv formalaşdırmışıq.

- Lənkəran klubları həmişə iddialı olub. İndiki hədəfiniz nə olacaq?
- Əlbəttə, çempionluq uğrunda mübarizə aparacağıq. İlk mövsümdə qələbə qazanmaq istəyirik. Bizi çətin mübarizə gözləyir. Amma buna hazırıq. Hədəfəmiz Region Liqasının qalibi olmaqdı.

- Hamıya bəllidi ki, Region Liqasında üç mövsüm mübarizə aparan kollektivlər 1-ci diviziona buraxılır. Siz bununla razılaşacaqsız? Yoxsa komanda 1-ci divizionda çıxış etməyi planlaşdırmır?
- Əlbəttə, bunu arzulayırıq. Düşünürəm ki, çempion olsaq, 1-ci divizionda çıxış edəcəyik. Buna ümid edirəm. Divizionda oynamaq üçün hər şey etməyə hazırıq.

- Bunun üçün AFFA rəhbərliyindən vəd almısız? Kimlərləsə görüşünüz olub?
- Yalnız baş katib Sərxan Hacıyevlə görüşmüşük. İndi əsas olan çempionatda nəticə əldə etməkdi. Bunlar sonranın işləridi. Əsas məqsədimiz çempion olmaqdı. Düşünürəm ki, bunu bacarsaq, bizi 1-ci diviziona buraxacaqlar. Ən azı buna ümid edirəm.

İLKİN SULTANLI