“Olimpiakos”un mərkəz müdafiəçisi Sokratis Papastatopulos Tofiq Bəhramov adına Respublika stadionunun qazonunu bərbad adlandırıb.

Yunan futbolçu bununla kifayətlənməyib, “Qarabağ”la qarşılaşmanın ingilis hakimlərini də hədəfə alıb. Onun fikrincə, Kreyq Pausonun başçılıq etdiyi hakimlər briqadası anlaşılmaz qərarlar verib. Papastatopulosun bu sözlərini oxuyanda təəccübümü gizlədə bilmədim. Düzdü, yunanlar çoxdan evlərinə qayıdıblar və hansısa formada onlara etiraz etmək imkanımız yoxdu. Amma həqiqəti özümüzü üçün aydınlaşdırmalı və ona hörmət etməliyik. Çünki həqiqətin müqəddəsliyi bizdən bunu tələb edir.

Nədi o həqiqət? Başlayaq elə hakimlikdən. Avrokuboklarda “Qarabağ” qədər hakim haqsızlığından, ədaləti qorumalı olanların yanlış qərarlarından əziyyət çəkən klub yoxdu. Tarixin xoşagəlməz səhifələrini vərəqləməyə başlasaq, qanımızı yenidən qaraltmış olarıq. Konkret “Olimpiakos”la oyuna gəlincə, 90 dəqiqə ərzində ingilis hakimlərin meydan sahiblərinə hansısa köməyi, simpatiyası hiss olundu? Təbii ki, yox. Görüş o qədər də sərt və sürətli keçmədi. Belədə hakimlərin işi də çətin deyildi. VAR texnologiyasının da tətbiqi onların işini asanlaşdırıb. Yaxşı başa düşürlər ki, hansısa vacib epizodda qərar verməyə çətinlik çəksələr, VAR-ın köməyinə arxalana bilərlər. Belədə meydana rahat çıxırlar, kobud səhv ehtimalı azalır. O ki qaldı Respublika stadionunun qazonuna, biz o örtüyün daha pis vaxtlarını görmüşük. “Olimpiakos”la görüş zamanı qazonda zaman-zaman problemlər müşahidə olunurdu, amma hansısa faciəvi durumdan söhbət gedə bilməzdi.

Gülməlisi odu ki, qazondan şikayət edən Papastatopulosun komandası Avropanın ən qapalı oynayanlarındandı. “Olimpiakos”un texnikalı oyuna meyl etməsi, rəngarəng hücumlar qurması futbol dünyasına tanış olmayan ssenaridi. “Qarabağ” səfərdəki matçda rəqibin qapısına üç cavabsız top vurmaqla yunanların gözünü əməlli-başlı qorxutmuşdu. Belədə onlar Bakıda daha ehtiyatlı oynayır, əsasən müdafiənin qayğısına qalırdı. Rəqibin baş məşqçi Miçel Qonsales “Qarabağ”ın startdakı həmlələrini görəndən sonra taktikaya yenidən əl gəzdirdi, “beton səddi” bir qədər də möhkəmləndirdi. Hər kəsə məlumdu ki, yararsız qazon daha çox hücum edənə, texnikalı oyun göstərməyə çalışana mane olur. Öz cərimə meydançası həndəvərində müdafiə olunmaqla məşğul olanlar üçün isə qazondakı problemlər göydəndüşmə fürsətdi. Çünki belə hallarda rəqibin hücumlarının sürəti, ötürmələrin dəqiqliyi aşağı düşür. Bu isə müdafiədə nəfəs dərə-dərə oynamağa, vəziyyəti düzgün təhlil etməyə kömək edir. Deməli, Papastatopulosun sözləri bəhanədən, “Olimpiakos”un çılğın azarkeşlərinin qəzəbini soyutmağa cəhddən başqa bir şey deyil.

Sokratis özü də etiraf edib ki, ilk 20 dəqiqədə üstünlük tam “Qarabağ”ın tərəfində olub. Yunan müdafiəçi görüşün nəticəsinin ədalətli olduğunu da qəbul edib. Lap elə eyhamla, minnətlə olsa belə. Bəli, “Qarabağ” adlı-sanlı rəqiblə oyunda özünəinam nümayiş etdirdi. “Köhlən atlar” vahid saat mexanizmi kimi çalışır, meydanda sözün bütün mənalarında böyük təcrübə sahibi kimi davranırdı. “Çərçivə”yə bitirici zərbələrin vurulmamasının səbəblərindən birini Qurban Qurbanov oyunsonrası mətbuat konfransında dilə gətirdi. Yunanıstandan qayıdandan sonra “Qarabağ” təyyarə ilə daha bir səfərə çıxmalı olmuşdu. Düzdü, budəfəki səfər elə də uzaq məsafəyə deyildi. Amma hər halda, müəyyən yoğrunluğun olması gözləniləndi. Məsələnin çox vacib tərəfi də var. Misli premyer-liqasında oynayan futbolçular üçün belə qrafik heç də xarakterik deyil. Başqa klubların futbolçuları həftədə bir dəfə oyuna çıxıb, bərpaya və istirahətə yetərincə vaxt qazanırsa, “Qarabağ”ın üzvləri bu xoşbəxtlikdən məhrumdu. Onlar ardıcıl neçənci mövsümdü bu qrafiklə oynamalı olur.

Bütün bu məqamları nəzərə alanda, “Qarabağ”ın ilk 20 dəqiqədəki tempi nə üçün davam etdirə, yunanların qapısına həlledici zərbələr vura bilmədiyini başa düşürük. Bütün bu məqamlar futbolun içində olanlardı. Yaxşı ki, “Qarabağ” bütün çətinliklərə rəğmən, üzərinə götürdüyü missiyanın öhdəsindən uğurla gəlməyi bacarır. Ardıcıl ikinci mövsümdü avrokuboklarda yaz mövsümünü də görür, azərbaycanlı azarkeşlərə bəxş etdiyi xoşbəxt anların müddətini artırır. Hələ bu harasıdı?! Azərbaycan çempionu Avropa Liqasının qrup mərhələsində ən uzun “quru” seriyaya malik üç komandadan biridi. Son üç görüşdə qapımızı toxunulmaz saxlaya bilmişik. "Frayburq" və “Real Sosyedad” kimi komandalarla eyni göstəriciyə imza atmaq bir Azərbaycan klubu üçün ciddi hadisədi. Yenə də bunun altında “Qarabağ”ın və Qurban Qurbanovun imzası var. “Qarabağ” gözümüzün önündə böyüməkdə, Avropada adından söz etdirməkdədi. Yolun uzun, üzün ağ olsun, “Qarabağ”!

AMAL