"Bu, əsasən klubların üzərinə düşən öhdəlikdi" - Aslan Şahgəldiyev
"Kəpəz”də olan infrastruktur problemləri hamıya bəlli idi və bir daha bu məsələ ilə bağlı ətraflı danışmaq istəmirəm. Məlum məsələlərdən Gəncə təmsilçisi bütün oyunlarını səfərdə keçirirdi və bundan əlavə, xərclər məsələsi də var idi".
"Footbal-plus.az" xəbər verir ki, bu sözləri Peşəkar Futbol Liqasının (PFL) vitse-prezidenti Aslan Şahgəldiyev jurnalistlərə açıqlamasında deyib.
PFL rəsmisi Gəncə şəhər stadionunun ikinci dəfə təftiş olunmasından sonra arenaya azarkeşlərin buraxılmasına icazə verildiyini bildirib: "Komandaların səfərə getməsi, oteldə qalması, bunlar hamısı müəyyən qədər maddiyyat tələb edir. Təhlükəsizliklə bağlı müvafiq rəy verilməmişdi, buna görə də klubun ev oyunlarını öz meydanında keçrimək icazəsi yox idi. Lakin sonradan "Kəpəz" bizə rəy təqdim etdi və stadion ikinci dəfə təftiş olundu. Yalnız bundan sonra arenanın birinci yarısına azarkeşlərin girişinə icazə verildi. Amma məsələ təkcə stadionun təhlükəsizlik məsələsi deyil, paltardəyişmə, hakimlər və dopinq otağı, jurnalistlər üçün mətbuat konfransı zalı, media sektoru, istilik sistemi və s. məsələlər yerində təftiş olundu. Klub lazımi işləri görmüşdü. Demək olar ki, bəzi kosmetik işləri saymasaq, hər şey hazır idi, onlar da oyunadək aradan qaldırılmalıdı".
Gəncə şəhər stadionunda işıqlandırma sistemindəki problemdən də danışan Şahgəldiyev bunun klubun üzərinə düşən öhdəlik olduğunu deyib: "İşıqlandırma ilə bağlı problem təkcə “Kəpəz”də deyil, Tovuz və Şamaxı şəhər stadionlarında da var. İndi matçları erkən saatalara təyin edib təbii işıqdan yararlana bilirik, amma məsələn, 1-2 ay bundan qabaq isti hava şəraitində bunu edə bilmirdik. İşıqlandırma məsələsini müzakirə edəcəyik. Amma bu, əsasən klubların üzərinə düşən öhdəlikdi və o qədər də ucuz başa gələn bir sistem deyil. Hazırda məsələ ilə bağlı PFL-in idarə heyətində müzakirələr gedir, müvafiq qərar qəbul olunandan sonra ictimaiyyətə açıqlama veriləcək".
Vitse-prezident Premyer Liqanın oyunlarının çəkilişi ilə bağlı da problemlərin olduğunu qeyd edib: "Azarkeşlər oyunlara gəlsə də, yayımçı şirkət məcburiyyətdən elə yerdən çəkir ki, tərəfdarlar görsənmir. Tovuz şəhər stadionunda və “Azərsun Arena”da belə problemlər var, çalışırıq onları da aradan qaldıraq".
Digər xəbərlər
