“Kəpəz”in ev oyunlarını keçirdiyi Gəncə şəhər stadionunun tribunalaraının qəzalı vəziyyətdə olduğundan xəbəriniz var.
Premyer-liqanın startına 5 gün qalmasına baxmayaraq, hələ də bilinmir ki, “sarı-göylər”in oyunlarına tamaşaçı buraxılacaq ya yox. Ümumiyyətlə, kuluarlarda gəzən söz-söhbətlərə inansaq, Gəncə klubu çempionatın ilk turlarında ev oyunlarını doğma şəhərdə yox, başqa məkanda, daha dəqiq desək, Bakıda keçirəcək.
Bütün bu qaranlıq məqamlara aydınlıq gətirmək üçün “Kəpəz”in icraçı direktoru İlqar Nadirini aradıq. İcraçı direktorun “Football-plus.az” açıqlaması isə heç də ürəkaçan olmadı:
“Bu suala üzümüzə gələn birinci-ikinci günü aydınlıq gələcək. Böyük ehtimalla, tribunaların qəzalı vəziyyətdə olduğunu nəzərə alan FHN azarkeşlərin stadiona girişinə icazə verməyəcək. Burda söhbət insan sağlamlığından gedir ki, hamı üçün vacib olanı da budu. Qurum üzümüzə gələn həftə bununla bağlı bizə rəsmi sənəd göndərəcək”.
Stadiona azarkeşlərin girişinə icazə verilməsə də, ən azı komandanın ev oyunlarını Gəncədə keçirməsində problem olmamalıdı. Ən azı arenanın qazonu futbol oynamağa imkan verir. Ancaq İlqar bəy bu mövzuda da inamlı danışmadı:
“Komandanın ev oyunlarının Gəncədə keçirilməsi yönündə işlər görülür. Çalışırıq Peşkar Futbol Liqasının tələblərini yerinə yetirək. Ancaq elə məsələlər var ki, onun həlli bizdən asılı deyil”.
RƏŞAD