Mahir Emreli niyə “Dinamo”dan kənarda qalıb?
Maraqlı günlər yaşayırıq.
Çempionlar Liqasının, Avropa Liqasının və Konfrans Liqasının təsnifat mərhələsinin oyunları keçirilir. “Qarabağ”dan başqa, qalan təmsilçilərimiz azarkeşləri üzməklə məşğuldu. Düzdü, bu gün keçiriləcək matçda “Neftçi” Cənubi Kipr “Aris”ini üstələyə bilər. “Qəbələ” və “Zirə”dən isə əlimizi üzmüşük. Nə isə, mövzumuz bu deyil.
Avrokuboklarda daha bir təmsilçimiz var. Söhbət hansısa klubdan getmir. Zaqreb “Dinamo”sunda çıxış edən Mahir Emrelini nəzərdə tuturuq. Onu yaşıl meydanda görməklə bağlı ümidlərimiz puça çıxmaqdadı. Ante Çaçiçin komandası Çempionlar Liqasının 2-ci təsnifat mərhələsinin cavab matçında səfərdə “Şkupi”ni 1:0 hesabı ilə məğlub edib, növbəti raunda vəsiqə qazandı. Amma Mahirsiz. Milli üzvü heç Şimali Makedoniyaya aparılmadı. Zədəsi hələ sağalmayan forvard heyətdən kənarda qalıb. Mahir eyni səbəbindən "Şkupi" ilə ilk oyunu da buraxmışdı. O, ölkə çempionatında da yeni mövsümün ilk matçlarını buraxmaq məcburiyyətində qalıb.
Xorvatiya mətbuatında yer alan məlumatlar bunlardı. Görünür, yığmamızın üzvünün zədəsi ağır olmasa da, oynamasına imkan vermir. Lakin mövsüm başlamamış Emreliyə ümidlər böyük idi. Hücumçu hətta komandasının heyətində qol da vurmuşdu. Belə ki, iyulun 1-də "Dinamo" yoxlama oyununda Slovakiya "Spartak"ı (Trnava) ilə qarşılaşmışdı. 3:3 hesabı ilə başa çatan qarşılaşmada Mahir də meydanda idi. Fasilədən sonra meydana çıxan hücumçu 88-ci dəqiqədə komandasını məğlubiyyətdən xilas edən qola imza atmışdı. Lakin sonradan vəziyyət dəyişdi. Ante Çaçiç onu oynatmamağa başladı. Xorvatiyalı mütəxəssis əvvəlcə Superkubokda “Hayduk”a qarşı, daha sonra çempionatının ilk turunda “Lokomotiva” ilə görüşdə Emrelini meydana buraxmadı. Bunun səbəbini isə belə izah etdi: “Son məşqdə 20 futbolçu var idi. Hansılar ki, “Lokomotiva” ilə matçda iştirak edəcəklər. Komandanı iki hissəyə ayırmışam. Qalanları “ikinci komanda”dadı. Nəzərə alsaq ki, üç gündən bir matçımız olur, vaxtı və rəqabət stimulu olmayan oyunçuların fərqli şəkildə hazırlığa ehtiyacları var. Ehtiyac hiss edəndə onları “birinci komanda”ya cəlb edəcəyik. “İkinci komanda”da zədədən geri qayıdanlar – Mahir Emreli, Boşko Şutalo, Antonio Marin, Marko Bulat və Amer Qoyak, həmçinin Emir Dilaver, Komnen Andriç və gənc Marko Brklyaça var”.
Daha sonra Mahir komandanın “Şkupi” ilə ev, "Slaven Belupo" ilə səfər matçında şans qazanmadı. Ümumiyyətlə, adı protokola salınmadı. Qeyd etdiklərimizdən hiss olunur ki, onun “Dinamo”da ciddi problemi var. Maraqlıdı, yoxlama görüşlərində meydana çıxan futbolçu sonradan necə zədəli olur?
Ümumiyyətlə, klub Mahirin zədəsi ilə bağlı hansısa rəsmi açıqlama verməyib. Yəni bilmirik ki, oyunçunun ayağı, yoxsa qolu qırılıb, zədəsi nədi… Düşünmək olar ki, yoxlama görüşlərində Mahir özünü yaxşı tərəfdən göstərə bilməyib. Ante Çaçiç də onun performansından narazıdı. Məhz bu səbəbdən də xorvatiyalı məşqçi zədəsini sağaltma prosesini bəhanə edərək onu heyətdən kənarda qoyub. Xatırlayırsızsa, iyunda Mahir millinin heyətində Belarusa qarşı matçda fərqlənmişdi. Daha sonra yoxlama oyunlarında meydana çıxan futbolçu harda zədələndi ki, bərpa dövrü də keçsin? İstirahət edəndə əzələsini dartıb, qolunu qırıb? Bunlarla bağlı hansısa məlumatımız yoxdu. Bildiyimiz tək şey var, Emreli “Dinamo”nun heyətində meydana çıxmır. Zədəli olmayıb oynadılmırsa, bunda tək günahkar özüdü. Deməli, Zaqrebə gəldiyi gündən şans verilən hücumçu bundan yararlana bilməyib. Məşqlərdə özünü yaxşı tərəfdən göstərə bilmir ki, baş məşqçi də onu oynatmır. Bir sözlə, Mahir Emreli ümidləri doğrultmur.
İLKİN SULTANLI
Digər xəbərlər
