Mini-futbol yığmamız Avropa çempionu oldu.

Təbii ki, burda əsas uğur meydanda mübarizə aparanlarındı. Lakin meydandan kənarda bir şəxs də var ki, onun qələbədə payı kifayət qədərdi. Söhbət Taleh Nəsibovdan gedir. O, Azərbaycan Mini-futbol Federasiyasının və “Zirə”nin prezidentidi. Dünən Bakıya dönən yığmanın yanında Taleh bəy də var idi. Funksioner hava limanında jurnalistlərin suallarını cavabladı.

- Düşünmək olar ki, ən çətin oyun slovaklara qarşı oldu?

- 1/8 finalda İsraili keçəndən sonra 1/4 finalda Slovakiya ilə görüşün ağırlığını başa düşürdük. Meydan sahibi olduqları üçün onlara qarşı simpatiya ola biləcəyini hiss edirdik. Amma uşaqlar milli ruh nümayiş etdirdilər, gözlərində qığılcım vardı. İnanırdım ki, belə istəklə slovakları keçəcəklər.

- Bildiyimizə görə, mini-futbol millimizin qarşısına Avropa çempionluğu hədəf qoyulmamışdı...

- Konkret hədəf yox idi. Amma əmin idik ki, qrupdan çıxsaq, finaladək irəliləyəcəyik. Çünki qrupumuz çox ağır idi. Qrupdan çıxandan sonra hədəf müəyyənləşdi. İştah diş altındadı.

- Dörd il əvvəl Ukraynanın paytaxtı Kiyevdə qrupda qalmışdıq. Bu 4 ildə nə baş verdi ki, qrupdan çıxdıq və Avropa çempionu olduq?

- Onda debüt edirdik. Hələ çox şey barədə məlumatımız yox idi. Gəldik, gördük və finala çıxmaq üçün nəyi necə etməli olduğumzu başa düşdük… Bu nəticə gördüyümüz işlərin bariz nümunəsidi. Təsisçi Orxan Məmmədov əvvəl futzala sponsorluq edib. Daha sonra “Zirə” klubunu təsis etdi. Bundan sonra Azərbaycan Mini-futbol Federasiyasını yaratdı.

- Sanki gördüyünüz işlərlə ən çox tənqid hədəfinə çevrilən qurumlara siqnal verirsiz ki, əsl idarəetmə belə olmalıdı...

- Açığı, biz kiməsə siqnal vermirik. Amma öz idarəetmə sistemimiz var. Düzgün iş görürük və bu cür idarə edirik. Allah da bizə bu qələbəni nəsib edib. Çünki sistemi düzgün qurmuşuq.

İLKİN SULTANLI