Bəxtiyar Soltanov unikal şəxsdi.

Üç həftə öncə “Xan Lənkəran”ın heyətində Region Liqasının finalında “Cəbrayıl”a uduzan yarımmüdafiəçi 2 gün öncə mini-futbol üzrə Avropa çempionu oldu. Bundan əlavə, o, turnirin ən yaxşı oyunçusu seçildi.

- Yığmamız ilk dəfə Avropa çempionu oldu. Nə hisslər keçirirsən?

- Avropa çempionu olduğumuz üçün sevincliyik. Yarış bizim üçün ağır başladı və ilk oyunda uduzduq. Ancaq sonra toparlandıq. Finalda Rumıniyanın zəif və güclü cəhətlərini bilirdik. Həmin oyuna daha məsuliyyətlə yanaşdıq və çempion olduq.

– Finalda hansı səhvləri aradan qaldırdız ki, qrupda uduzduğunuz rumınlara bu dəfə qalib gəldiz?

– İlk oyunda meydança və rəqibi tanımamaq amili vardı. Finaldan öncə onların zəif nöqtələri üzərində işləyib qalib gəldik.

– Turnirin ən yaxşı oyunçusu olacağını gözləyirdin?

– Vallah, gözləmirdim. Amma məni buna layiq gördülər. Bu mükafatda komanda yoldaşlarımın da əməyi var.

– Mini-futbolda karyeranı davam etdirəcəksən?

– İnşallah.

- Mini-futbol üzrə xarici klublardan təklif olub?

– Xeyr. Bu barədə hələ heç nə eşitməmişəm. Nəsə olsa, biləcəksiz.

İLKİN SULTANLI