Millimiz Millətlər Liqasında doğma meydanda ilk oyununa çıxdı. Qarşılaşmanın şəhərin mərkəzindən 36 km uzaqda olmasına baxmayaraq, azarkeşlər matça maraq göstərmişdilər.

“Dalğa Arena”nın ətrafında maraqlı ab-hava var idi. Düzdü, AFFA azarkeşlər üçün ekspres avtobuslar ayırmışdı. Bu da fanatların Mərdəkana rahat gəlməsinə səbəb olmuşdu. Buna rəğmən, 6700 tamaşaçı tutumuna malik stadion tam dolmamışdı.

Komandalar meydana çıxarkən stadionda bayram ab-havası yaşandı. Ölkələrin himnindən sonra isə biranlıq çaşqınlıq yarandı. “Sektor 11”in yer aldığı tribunadakılar Slovakiyanın qapıçısına təzyiq göstərdilər. Hakimin qərarı ilə komandaların yerlərini dəyişməsi fanatların sevincinə səbəb oldu. Çünki “Sektor 11” üzərində Şahruddinin şəkli olan pankart açmışdı. Azarkeşlərin “Şahruddin, Şahruddin” sədaları ilə qarşılaşma start götürdü.

Matçın ilk 20 dəqiqəsində bizim adımıza tək müsbət məqam ancaq fanatlar idi. Bir tərəfdən “Mehtər” marşı səslənir, digər tərəfdən nağaralar, davullar susmaq bilmirdi. Slovaklar isə qapımızın önündə “yatmışdılar”. 25-ci dəqiqədən sonra isə futbolçularımız fanatları həyəcanlandırmağa başladı. Ardıcıl hücumlar azarkeşlər daha da coşdurdu. Ən böyük həyəcan keçirən şəxs, təbii ki, Canni de Byazi idi. Bəlkə də görüşü canlı yayınlayan “CBC Sport” ayrıca kamera ayırmalı idi ki, italiyalını çəksin. Millinin baş məşqçisinin ilk hissədəki hərəkətlərindən film hazırlamaq olardı. Ehtiyat oyunçular skamyasında oturan Mahir Emreli də yerində sakit dayanmırdı. Ramil hər dəfə yerdə qalarkən ortalığa atılıb 4-cü hakimdən penalti tələb edirdi. Lakin hər dəfə referinin fiti susurdu.



Fasilədən sonra azarkeşlər millinin nəsə edəcəyinə ümid bəsləyirdi. Emrelinin də Renatın əvəzinə meydana çıxması onların sevincinə səbəb olmuşdu. Lakin reallıq fərqli idi. Slovakiya səviyyə fərqini göstərdi. Yığmamız isə yalnız müdafiə olunmaqla kifayətlənirdi. Maraq üçün qeyd edək ki, stadiona təşrif buyuranların çoxu əllərində telefonla mini-futbol yığmamızın Avropa çempionatının yarımfinalında Qazaxıstanla görüşünü izləyirdi. Meydanda bizim adımıza maraqlı nəsə olmasa da, ehtiyat oyunçular skamyasındakılar özlərinə əl qatmışdılar. 65-ci dəqiqədə əvəzlənən Ramil sona qədər ayaqüstə qaldı.



Qarşılaşmanın taleyini isə 1 qol həll etdi. Vayss hesabı açan kimi azarkeşlər stadionu tərk etməyə başladı. Slovakların ikinci qolunun VAR tərəfindən ləğv edilməsi sevinclə qarşılandı. Slovakiyaya qarşı 6 müdafiəçi ilə oynayan millinin matçında ancaq belə şeylər üçün sevinə bilərik. De Byazinin rəhbərlik etdiyi komanda isə Millətlər Liqasında 3-cü matçında 2-ci məğlubiyyətini alaraq böyük ehtimalla qrup lideri olmaq şansını itirdi. “Dalğa Arena”da De Byaziyə olan ümidlər Xəzərin sularına qərq oldu...

İLKİN SULTANLI