Andoni İraolanın “Liverpul”un “sükanı arxasına” keçəcəyini xəbər vermişdik. Artıq Mersisayd klubu ilə 2028-ci ilin yayına qədər müqavilə bağlayan bask mütəxəssis iyunun sonunda vəzifəsinin icrasına başlayacaq. “Qırmızılar” məhz həmin vaxt yay məzuniyyətindən dönərək yeni mövsümə hazırlaşmağa başlayacaq.

"Football-plus.az"ın məlumatına görə, İraola təyinatından dərhal sonra klub telekanalına müsahibə verib. Müsahibənin ən önəmli məqamlarını təqdim edirik.

Təyinatla bağlı
Çox həyəcanlıyam, çox. “Liverpul”un nə demək olduğunu bilirsiz, dünyanın nəhəng, ən böyük klublarından biridi. Həmişə bu klubu xüsusi saymışam, təkcə futbol baxımından yox, ilk növbədə emosional baxımdan. Oyunlar arasındakı bütün həftə boyunca adamlar burda futbolu düşünür, kluba xüsusi ehtirasla yanaşırlar. “Atletik”də oyun təcrübəm olub, orda da vəziyyət hansısa mənada oxşardı. Həmin hissləri bir daha yaşamaq əla olacaq.

Futbola münasibəti ilə bağlı
Mənim üçün futbol emosiyadı, ehtirasdı. Yəqin ki, soyuqqanlı adamam, deyərdim ki, adi həyatda yetərincə rasional adamam. Ancaq o da düzdü ki, oyun başlayandan sonra, qolu bayram etmək lazım gələndə adamın içində nəsə yanır, eləmi? Mənə elə gəlir ki, bu daxili enerji sənə oyunçu, azarkeş, məşqçi kimi lazımdı. Bunun üçün “Enfild”dən yaxşı yer yoxdu. Və mən istərdim ki, - bunu öz tərəfimdən, oyunçularım tərəfindən deyirəm - bütün bu insanlar da özlərini futbolla, komandanın üslubu və dəyərləri ilə eyniləşdirsinlər. Biz tam şəkildə can yandıracağıq, buna söz verə bilərəm.

“Enfild”lə bağlı
Mən rəqib düşərgədəydim – Kyezanın ötən mövsümdəki birinci oyunun sonunda vurduğu qolu hələ də xatırlayıram. Hesab 2:2-di, mən özlüyümdə düşünürəm ki, 0:2-dən sonra hesabı bərabərləşdirmişiksə, xal qazana bilərik. Ancaq Kyeza vurdu və stadion az qala partlayacaqdı. Bu, sadəcə, dəlilik idi, düzdü? İndi isə bunu digər tərəfdən hiss etmək istəyirəm. İstənilən kluba gələndə əvvəlcə özünü göstərmək lazımdı, ona məxsus olduğunu göstərməlisən. Ancaq mən bunu mümkün qədər tez etmək istəyirəm ki, bu icmanın tamhüquqlu bir parçası olum.

“Liverpul”a keçmək qərarı ilə bağlı
Əlbəttə, Riçard Hyuzun (“Bornmut”un sabiq, “Liverpul”un indiki idman direktoru – red.) mənlə əlaqə saxlaması həlledici oldu. Masanın o biri tərəfində vaxtilə birgə çalışdığın adam əyləşirsə, hər şey daha asan olur. Ancaq deyərdim ki, ilk növbədə hər şey klubla bağlıdı. Məhz bu məqam məni cəlb etdi. “Liverpul” mənə dünyanın yaxşı oyunçularını çalışdırmaq imkanı yaradır, yaxşı oyunçular isə sənə həmişə titullar uğrunda mübarizə aparmaq, onları qazanmaq şansı verir. Aydın məsələdi ki, yeni iş yerinə gələndə hər şeyi birdən qazanmağı vəd edə bilməzsən. Ancaq həqiqət ondan ibarətdi ki, hara gəldiyimi və məndən nə gözlədiklərini anlayıram.

İyun planları ilə bağlı
Bütün informasiyanı əldə edəcəyim günü səbirsizliklə gözləyirəm. Klubu, meydandan kənarda yaşananları daha yaxşı anlamaq üçün hər kəslə danışıram. Hələ vaxtımız var. Oyunçularla praktik işə başlayana qədər hələ bir ay vaxtımız var, ancaq bu müddətdən elə yararlanmaq istəyirəm ki, burda işə başlayanda tam hazır olum. Bu işin məndən tələb etdiyi dərəcədə yaxşı hazırlaşmalıyam.

Gənc oyunçularla işlə bağlı
Dünya çempionatı və orda iştirak edəcək təcrübəli oyunçuların komandaya bir qədər gec qoşulacağı sayəsində gənc oyunçulardan bəziləri ilə ayrıca və məqsədəuyğun şəkildə çalışmaq imkanımız olacaq. Bu isə mənə akademiyadan gələn və icarədən dönən oyunçuları daha yaxından tanımaq imkanı yaradacaq. Mövsümə hazırlığın ilk mərhələsində, Amerika turunda bəzi vacib işlər görəcəyik. Hələ ki hər şey bizim üçün yetərincə uğurlu görünür, mövsüm başlayana qədər vacib qərarlar vermək üçün əlimizdə yetərincə informasiya olacaq.

Oyun üslubu ilə bağlı
Artıq üç ildi premyer-liqada çalışdığıma görə müəyyən üstünlüyüm var. Yəqin ki, adamlar “Bornmut”un necə oynadığını görüb. Aydın məsələdi ki, bəzi şeyləri dəyişməli və “Liverpul”un reallıqlarına uyğunlaşdırmalıyıq. Ancaq klub identikliyini itirmək istəməzdim: intensivlik, aqressivlik və bununla yanaşı, mütəşəkkillik! Bu fundamental prinsiplər “Liverpul”un uzun illər ərzində əsaslandığı oyun fəlsəfəsinə uyğundu. Oyunçulara və ətrafdakı şərtlərə uyğunlaşmalıyıq.

Bu anın özü və ailəsi üçün əhəmiyyəti ilə bağlı
Bu yalnız mənim günüm deyil. Mən San-Sebastyanın yaxınlığına olan, fəhlə sinfinin yaşadığı çox kiçik şəhərcikdənəm. Əvvəlkə peşəkar futbolçu olmağa aparan yolu keçdim, sonra Kiprdə yeni yola başladım, La Liqaya, ardından premyer-liqaya köçdüm. İndi isə burdayam. Bu yolda mənə çox, lap çox adam yardım edib. Və hər dəfə bu və ya başqa adamdan mesaj alanda onların mənim üçün etdiklərini, mənə necə yardım göstərdiklərini xatırlayıram. İndi isə onlara nəyisə göstərməklə bağlı motivasiyalıyam: birlikdə bura qədər gəlib çıxmışıq, bu anın ləzzətini birlikdə yaşayaq.

Azarkeşlərə mesajı ilə bağlı
Onlardan çox şey xahiş edə bilmərəm, komandaya necə yanaşdıqlarını bilirəm. Yalnız onu deyə bilərəm ki, sizlərdən biri olmaq, işimlə bunu haqq etmək istəyirəm. Birlikdə oyunumuzdan və bizi irəlidə gözləyənlərdən həzz almalıyıq.

Bonus əvəzi
Yürgen Kloppun 2024-cü ilin yanvarında İraolanın “Bornmut”u haqda dedikləri: