Mövsümün “Böyük dəbilqə” seriyasından olan ikinci turniri başa çatdı.

Qadınlar arasında finalçıların müəyyənləşdiyini yazmışdıq. Şənbə günü rusiyalı Mirra Andreyeva polşalı Maya Xvalinska ilə qarşılaşdı. Mirra 1 saat 23 dəqiqə davam edən finalda inamlı qələbə qazandı – 6:3, 6:2. Xvalinskanın dünyanın 114-cü tennisçisi olduğunu nəzərə alsaq, belə nəticə heç kimi təəccübləndirmədi.

Karyerasında ilk dəfə “Böyük dəbilqə”nin finalında oynayan 19 yaşlı Andreyeva 2014-dən bəri belə turnirdə qələbə qazanan ilk ruiyalı qadın oldu.

Həmin il Mariya Şarapova “Rolan Qarros”un finalında rumıniyalı Simona Halepi məğlub etmişdi. Mirra Fransa paytaxtında qazandığı bu uğur sayəsində həm də bank hesabına 3,2 milyon dollar əlavə edəcək. Bu, Rusiya tennisi üçün rekord mükafat məbləğidi. Əvvəlki rekord 2014-də “Rolan Qarros”da qələbəyə görə 2,25 milyon dollar qazanan Mariya Şarapovaya məxsus idi. Kişiləri də nəzərə alsaq, indiyə qədər ruslar arasında mütləq rekordçu 2021-də “US Open”də qələbəyə görə 2,5 milyon dollar qazanan Daniil Medvedev idi.

Andreyeva “Rolan Qarros”un tarixinə 1992-ci ildən bəri ən gənc çempion kimi düşdü. Onda titulu ardıcıl 3-cü dəfə qazanan Monika Seleşin 18 yaşı var.

Kişilər arasındakı yarımfinal görüşlərindən biri baş tutdu. Aleksandr Zverev Yakub Menşikin müqavimətini 4-cü setdə qırdı. Amma İtaliya dueli alınmadı. Ona görə ki, dünyanın 104-cü raketkası Matteo Arnaldi virusa yoluxmuşdu. Belədə onun həmvətəni Flavio Kobolli korta çıxmadan finala vəsiqə qazandı.

Kişilərin turnirində isə final oyunu keçirildi. 4 saat 19 dəqiqə davam edən duelin sonunda Zverev sevindi. 29 yaşlı almaniyalı karyerasında ilk dəfə “Böyük dəbilqə” turnirinin qalibi oldu.

O, indiyə qədər “US Open” (2020), “Australian Open” (2025) və “Rolan Qarros”da (2024) finala çıxsa da, hər dəfə uduzmuşdu.

Kişilər
yarımfinal
A.Zverev (Almaniya, 2) - Menşik (Çexiya, 26) 7:5, 6:2, 3:6, 6:3
Kobolli (İtaliya, 10) – Arnaldi (İtaliya) imtina
final
A.Zverev (Almaniya, 2) - Kobolli (İtaliya, 10) 6:1, 4:6, 6:4, 6:7 (5:7), 6:1
Cütlərin yarışı, final: Qranolyers/Sebalyos (İspaniya/Argentina, 1) – Heliovaara/Patten (Finlandiya/B.Britaniya, 2) 6:4, 6:2

Qadınlar
final
M.Andreyeva (Rusiya, 8) - Xvalinska (Polşa) 6:3, 6:2