“Son çempionluqla birlikdə mühüm bir göstəriciyə nail olduq. Ardıcıl 4-cü çempionluqla Türkiyə futbolu tarixinin rekordunu təkrarladıq. Bu hadisə Türkiyədə cəmi iki dəfə baş verib və hər iki halda bunu “Qalatasaray” bacarıb. Bu, heç də asan bir şey deyil. Düzdü, “böyük beşlik”də daha rəqbətcil çempionatlar var. Amma orda bundan da uzun seriyalar olub. “Real” ardıcıl 5, “Lion” 7, “Yuventus” 9, “Bavariya” 11 il çempion olub. 4-cü çempionluğumuz çox çətin alındı. Zəfəri doyunca qeyd etdik. İndidən yeni bir hədəfimiz var. Ardıcıl 5-ci çempionluğu qazanmaqla Türkiyə futbolunda ilkə imza atmaq istəyirik. Heyətimiz yaxşı olsa da, ÇL-də çıxış etməyin yaratdığı gözlənti ilə superliqanı qazanmaq məcburiyyətini balanslaşdırmaq bəzən çətin olur. ÇL-də də çox yaxşı mövsüm keçirdik və nəhəng klublarla başabaş oynadıq. Ancaq mənim üçün bu 4 çempionluq arasında ən çətin və yaddaqalanı ikincisi oldu. Böyük bir marafonu xatırladırdı. 102 xal qazanaraq tarixi rekord qırdıq. “Fənərbaxça” da 99 xalla öz rekordunu yenilədi. Okan Burukun “Qalatasaray”a xüsusi sevgisi var. Çünki burda yetişib və futbolçu kimi də önəmli uğurlar qazanıb. İndi də məşqçi kimi tarix yazmaq istəyi böyükdü. Qazandığı titullardan savayı onun əsas özəlliyi ulduz oyunçularla anlaşmağı bacarmasıdı. Adının Avropa klubları ilə yanaşı hallanması normaldı. Onda həm də Avropa təfəkkürü var. İtalyan, ingilis dillərində sərbəst danışır. Gələcəkdə nə olacağını bilmirəm. amma fikrimcə, Okan Buruk gec-tez böyük çempionatlardan birində işləmək fürsəti qazanacaq. Açığı, yavaş-yavaş baş məşqçi olmaq barədə planlar cızıram. Bunun yaxın vaxtlarda reallaşacağını düşünürəm. Son iki ildə əslində bəzi fürsətlər qarşıma çıxmışdı. Amma Okan Buruk və “Qalatasaray”la aramızdakı isti münasibətləri nəzərə alaraq burda davam etməyə qərar vermişdim. Burda çox xoşbəxtəm və heç bir problemim yoxdu. Ancaq özümü baş məşqçi kimi sınayaraq yeni bir macəraya atılmaq istəyirəm”.