Çiro Ferrara bu yay keçiriləcək dünya çempionatı zamanı DAZN telekanalında ekspert kimi fəaliyyət göstərəcək.

“Napoli” ilə 2, “Yuventus”la 5 dəfə ölkə çempionu olan İtaliya yığmasının sabiq müdafiəçisi ölkə futbolu ilə bağlı aktual sualları cavablayıb. 59 yaşlı Ferraranın 11 il (1994-2005) çıxış etdiyi, ağ-qara formasında 358 oyun keçirib 20 qol vurduğu “Yuventus”un mövcud vəziyyəti və perspektivləri, həmçinin milli komandanın növbəti uğursuzluğu haqda düşüncələri daha çox maraq doğurur.

- Spalletti ilə müqavilənin yenilənməsi doğru qərardı?
- Hə. Hələ bir müddət əvvəl DAZN-a açıqlama verərək demişdim ki, Spallettinin “Yuventus”dakı gələcəyi ilkin nəticələrdən asılı olmamalıdı. Çünki o, yaxşı iş görür və idman direktoru Ottolini mənim açıqlamamdan çox keçmədən klubun baş məşqçi ilə əməkdaşlığı davam etdirəcəyini bildirdi. Luçanonun mövsümün gedişində başına keçdiyi komandadakı nəticələri qənaətbəxşdi: “Yuventus” bir neçə oyunda xallar itirsə də, A seriyasında oyun ərzində yaradılan qol vəziyyətləri planında həmişə yüksək yerlərdə olub. Bu yaxınlara qədər bəxt də komandadan böyük ölçüdə üz döndərmişdi. Nəhayət, Berqamoda çətinliklə də olsa, qələbə qazandı...

- Hazırda onun nail olduğu əsas uğur nədi?
- O, paltardəyişmə otağına tam nəzarət edir. Hər şeydən əvvəl “Yuventus”a rəhbərlik etmək üçün təcrübə və bacarığa malikdi.

- Vlahoviçin müqaviləsi ilə bağlı məsələ haqda nə düşünürsüz?
- Hər şey iqtisadi aspektdən asılıdı. Mövcud rəqəmləri (serb hücumçunun illik maaşı 12 milyon avrodu – red.) unutmaq lazımdı. Məvacib bir qədər aşağı salınarsa, məncə, Duşan “Yuventus” səviyyəsində oyunçu ola bilər. Onun əsas heyətdə oynayıb-oynamadığını bilmirəm, amma Vlahoviç ilk dəqiqələrdən oynamağa qadirdi.

- İndi “Yuventus” nə etməlidi?
- İtaliyada bir çox klubun hədəfi Çempionlar Liqasına vəsiqə qazanmaqdı. Çünki bu hədəfə çatmaq maliyyə baxımından vacibdi. Əvvəllər ilk növbədə ölkə çempionu olmaq haqda düşünməliydin. Ona görə ki, bu uğur avtomatik Çempionlar Liqasında iştirak demək idi. Buna görə də deyirəm: “Yuventus” ilk növbədə skudetto uğrunda mübarizə aparmalıdı. Komandanın çempion olub-olmayacağı bəlli deyil, amma əsas hədəf məhz bu olmalıdı. Yeni mövsüm ərəfəsində əsas üstünlükləri Spalletti ilə bağlı olacaq: növbəti marafona artıq komandanı yaxşı tanıyan mütəxəssislə başlayacaqlar.

- Sizin üçün hansı komandanın oyununu izləmək daha xoşdu?
- Fürsət tapdıqca “Komo”nun oyunlarına baxıram, hərçənd bu komandanın heyətində italiyalı futbolçu görmədiyimə görə təəssüflənirəm.

- Ardıcıl üçüncü dünya çempionatının İtaliya yığmasının iştirakı olmadan keçiriləcəyi haqda nə düşünürsüz?
- Bu faktı etiraf etməliyik: artıq dünyanın ən yaxşı oyunçularına malik deyilik, istedadlı italiyalı gənclər isə yetişmir. İstənilən halda gənc futbolçulara şans verməliyik. Komandanın iştirak ərizəsində italyanların faiz göstəricisini artırmaqla iş bitmir, onların oynamaq imkanı olmalıdı. Əks halda bunların heç bir əhəmiyyəti olmayacaq.

- Konte mövsümün sonunda “Napoli”dən gedəcək?
- Ötən mövsümün gedişində Antonionun Neapolda qalacağına əmin idim, belə də oldu. Bu mövsüm isə bəzi məqamlarda onun komandadakı fəaliyyətini davam etdirəcəyinə şübhə etmişəm, amma sonradan fikrimi dəyişmişəm. Ümid edirəm ki, tezliklə prezident De Laurentislə görüşəcək və onlar gələcək əməkdaşlıq barədə müzakirələr aparacaqlar.

- Bəs Kontenin milli komandanın baş məşqçi vəzifəsinə namizəd olması barədə nə düşünürsüz?
- O, futbolumuz üçün çox çətin görünən vəziyyətdə uyğun füqur ola bilər. Ancaq bu, Kontenin yığmaya mütləq qayıdacağı anlamına gəlmir. O və Alleqri indi əlçatan deyillər, bu məsələdə çox şey onların işlədiyi klublardan asılı olacaq.

- Alleqri “Milan”ı Çempionlar Liqasına qaytara biləcək?
- Bunu etməlidi, sadəcə, buna nail olmağa borcludu... “Milan” çempionatın əksər hissəsində 2-ci yerdə görünüb və çempionluq uğrunda mübarizə aparıb. “Napoli”yə məğlubiyyət böyük zərbə oldu, komanda “Udineze” ilə matçda isə çox pis görünürdü. Bundan sonra ciddi səhvlərə yol verməməlidilər, çünki əsas rəqiblər sürəti heç də azaltmırlar.