“Əslində oyunun gərgin keçəcəyi əvvəlcədən sezilirdi. Süni meydanda, ümumiyyətlə, “Qarabağ” çox yaxşı görünmür, sərt hava şəraiti də bunun üzərinə gəldi. Ölkə çempionantında “Turan Tovuz”la oyun da buna işarə idi. Tovuzda da o qədər yaxşı təsir bağışlamamışdılar. Ümumiyyətlə, “Qarabağ”ın builki çıxışı azarkeşlər tərəfindən çox bəyənilmir. Amma bəzən pis oynayıb qələbə qazanmaq lazım gəlir. Çünki istənilən halda bu turnirdə yola davam etmək istəyirsənsə, xallara ehtiyac var. Bəlkə də oyunun belə alınmasının əsas səbəblərindən biri ön xətdəki oyunçularının passivliyi idi. Yəni pressinq edərkən çox hərəkətsiz idilər. Ən çox çətinlik çəkənlər isə meydanın mərkəzində Patrik Andrade ilə Marko Yankoviç oldu. Çünki rəqib oyunçular Kaşuk, Juninyo, Addai və Zubiri asanlıqla arxada qoyurdu. Zubir hücumların təşkilində yaxşı görünsə də, ümumilikdə aqressivlik baxımından çox zəif təsir bağışladı. Rəqib bizi uzun oynamağa vadar etdi. Bu da cəmi 15-20 dəqiqə çəkdi. Bəlkə də son 6 dəqiqədəki əzmkarlığın hesabına qələbəni saxlaya bildik. Düşünürəm ki, bunlar “Qarabağ”ın dinamikasında enişlə bağlıdı. Öndəki oyunçuların təzyiq etmirlər, rəqibə rahat oyun qurmağa imkan verirlərsə, istər-istəməz topa nəzarəti itirmiş olursan. Bəlkə də bu oyunda bir az bəxtimiz də gətirdi. Çünki rəqib futbolçuların ustalıq səviyyəsi çatmadı ki, o qolları reallaşdırsınlar. Yalnız birini vurdular. Hesab 3:2, 4:2 rəqibin xeyrinə də ola bilərdi. Amma bayram günündə azarkeşlər üçün vacib qələbə idi. Effektli olmasa da, yəni zəif oyun nümayiş etdirib komanda qələbə qazanırsa, növbəti oyunla üçün motivasiyadı. Zəif oyun yaddan çıxıb gedəcək, ortada qalan o 3 xal olacaq. Ona görə bəzən belə oyunlarla da rastlaşmaq mümkündü. Futbolda belə şeylər qaçılmazdı”.